काठमाडाैं। चितवनमा आयोजना हुन लागेको राष्ट्रिय स्वतन्त्र पार्टी (रास्वपा) को पहिलो ऐतिहासिक केन्द्रीय महाधिवेशनको भव्य उद्घाटन पार्टी सभापति रवि लामिछाने र प्रधानमन्त्री बालेन्द्र (बालेन) शाहले संयुक्त रूपमा गर्ने भएका छन्।
भरतपुरमा असार ७ गतेदेखि ९ गतेसम्म सञ्चालन हुने यस महाधिवेशनको तयारी अन्तिम चरणमा पुगेको छ। महाधिवेशनको विशेष उद्घाटन समारोहमा प्रधानमन्त्री शाहसहित दुवै शीर्ष नेताहरूको गरिमामय उपस्थिति रहने रास्वपाले आधिकारिक रूपमा जनाएको छ। प्रधानमन्त्री बालेन शाह उद्घाटन समारोहका अतिरिक्त महाधिवेशनका अन्य आवश्यक आधिकारिक कार्यक्रमहरूमा समेत सहभागी हुने तालिका रहेको छ।
महाधिवेशनको पूर्वसन्ध्यामा उद्घाटनस्थलमा सञ्चारकर्मीहरूसँग कुराकानी गर्दै रास्वपाका महामन्त्री भूपदेव शाहले नयाँ केन्द्रीय नेतृत्व चयन सर्वसम्मत र सहमतिका आधारमा गर्ने अधिकतम प्रयास भइरहेको जानकारी दिएका छन्।
पार्टीले हालसम्म हासिल गरेको अभूतपूर्व राजनीतिक सफलताको मुख्य कडी नै आन्तरिक एकता र सहकार्य रहेको उल्लेख गर्दै उनले महाधिवेशनमार्फत पनि सबै पक्ष र आकांक्षीहरू सम्मानित हुने साझा वातावरण निर्माणका लागि नेतृत्व पंक्ति निरन्तर छलफलमा जुटेको बताए।
सबै शक्ति र विचारहरू एकै ठाउँमा उभिएकै कारण दुईतिहाइ मत हासिल गर्न सम्भव भएको स्मरण गर्दै महामन्त्री शाहले महाधिवेशनपछि पनि सबै साथीहरूले गौरव महसुस गर्ने गरी बाहिरिने वातावरण बनाउन अहोरात्र खटिरहेको प्रष्ट पारे। यद्यपि, सर्वसम्मतिको प्रयास सफल हुन नसकेको खण्डमा पूर्ण लोकतान्त्रिक र सांगठनिक अभ्यास अनुरूप स्वस्थ प्रतिस्पर्धात्मक निर्वाचन प्रक्रियाबाटै नेतृत्वको टुङ्गो लगाइने उनको भनाइ छ।
महाधिवेशनका लागि चितवनलाई नै रोजिनुको विशेष रणनीतिक र भावनात्मक कारण रहेको समेत महामन्त्री शाहले खुलासा गरेका छन्। चितवन रास्वपाको जन्म भएको ऐतिहासिक थलो मात्र नभई राजनीतिक आन्दोलन र चुनावी लहरमार्फत पार्टी स्थापित भएको मुख्य उद्गम भूमि समेत भएकाले चौतर्फी पक्षको मूल्यांकन गरेर नै यस क्षेत्रलाई महाधिवेशनस्थलका रूपमा चयन गरिएको उनले प्रष्ट पारे।
महाधिवेशनलाई पार्टी जीवनको सबैभन्दा महत्वपूर्ण उत्सवका रूपमा लिइएको भन्दै व्यवस्थापनलाई चुस्त बनाउन महामन्त्री शाहले विभिन्न उपसमितिका संयोजकहरूसँग छुट्टाछुट्टै छलफल गरी तयारीको अन्तिम अवस्थाबारे जानकारी लिएका छन्।
