काठमाडौं। नेपाली कांग्रेसले पार्टीको सङ्गठन सुदृढीकरण अभियानअन्तर्गत नयाँ क्रियाशील सदस्यताका लागि देशव्यापी रूपमा आवेदन खुला गरेको छ। महामन्त्री प्रदीप पौडेल संयोजक रहनुभएको सदस्यता व्यवस्थापन समितिको सोमबार बसेको बैठकले नयाँ क्रियाशील सदस्यता वितरण प्रक्रिया अगाडि बढाउने औपचारिक निर्णय गरेको हो। पार्टीका कार्यवाहक मुख्यसचिव कृष्णप्रसाद दुलालले बैठकको निर्णय र आवेदन खुला गरिएको विषयमा आधिकारिक जानकारी दिएका छन्।
कांग्रेसका अनुसार नयाँ क्रियाशील सदस्यता प्राप्त गर्नका लागि आवेदकहरूले मुख्य गरी तीनवटा विषयमा आफ्नो प्रतिबद्धता जनाउनुपर्ने अनिवार्य व्यवस्था गरिएको छ।
जसअन्तर्गत नेपालको संविधान, नेपाली कांग्रेसको पार्टी विधान र नियमावली तथा पार्टी अनुशासनको पूर्ण पालना गर्ने लिखित प्रतिबद्धता जनाएर आवेदन दिने योग्य नागरिकहरूले मात्रै नयाँ क्रियाशील सदस्यता प्राप्त गर्न सक्नेछन्। यसपटक इच्छुक आवेदकहरूलाई सहज होस् भन्ने उद्देश्यले कांग्रेसले पार्टीको आधिकारिक वेबसाइटमार्फत सरल र डिजिटल रूपमा आवेदन दिन सकिने व्यवस्था समेत मिलाएको छ।
नेपाली कांग्रेसमा वि.सं. २०७८ सालमा सम्पन्न भएको १४ औँ महाधिवेशनका क्रममा कुल ८ लाख ७० हजार क्रियाशील सदस्यहरू आबद्ध रहेका थिए।
तीमध्ये गत पुस महिनासम्मको अवधिमा ६ लाख सदस्यहरूले मात्र आफ्नो सदस्यता नवीकरण गराएका थिए। त्यस समयमा नवीकरण प्रक्रियामा सहभागी भएका पुराना सदस्यहरूको विवरणलाई वैशाख १ गतेदेखि जेठ २१ गतेसम्मको समय सीमा तोकेर यतिबेला सङ्गठन भित्र अध्यावधिक (अपडेट) गर्ने कार्य तीव्र रूपमा भइरहेको छ।
पुराना सदस्यहरूको विवरण सच्याउने र अध्यावधिक गर्ने कार्यसँगै पार्टीले नयाँ पुस्तालाई आकर्षित गर्न देशैभर नयाँ क्रियाशील सदस्यता वितरणको आवेदन समेत एकैसाथ खुला गरेको हो।
