काठमाडौं। राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछाने औपचारिक भ्रमणका क्रममा छिमेकी मुलुक भारतको राजधानी नयाँदिल्ली पुगेका छन्। राजनीतिक तथा द्विपक्षीय सम्बन्ध सुदृढीकरणका लागि भारत प्रस्थान गरेका लामिछानेलाई दिल्लीमा भव्य स्वागत गरिएको छ।
दिल्लीस्थित इन्दिरा गान्धी अन्तर्राष्ट्रिय विमानस्थलमा ओर्लनासाथ उनलाई भारतको सत्ताधारी दल भारतीय जनता पार्टी (भाजपा) का शीर्ष नेताहरूले स्वागत गरेका हुन्। लामिछानेको स्वागतका लागि भाजपाका केन्द्रीय महासचिव अरुण सिंह र विदेश विभाग प्रमुख विजय चौथाइवाले आफैं विमानस्थल पुगेका थिए। विमानस्थलको विशिष्ट कक्षमा भएको उक्त स्वागतलाई दुई देशबीचको राजनीतिक र कूटनीतिक सम्बन्धका दृष्टिकोणले निकै महत्वपूर्ण मानिएको छ।
नेपालमा नयाँ राजनीतिक शक्तिका रूपमा उदाएको रास्वपाका प्रमुखलाई भारतको संस्थापन पक्ष र सत्ताधारी दलका उच्च नेताहरूले विमानस्थलमै पुगेर स्वागत गर्नुलाई राजनीतिक वृत्तमा निकै अर्थपूर्ण रूपमा हेरिएको छ।
यसअघि स्थापित पुराना दलका शीर्ष नेताहरूलाई मात्र दिइने स्तरको प्राथमिकता रास्वपा सभापति लामिछानेलाई पनि दिइनुले भारतले नेपालका नयाँ राजनीतिक शक्तिहरूसँगको सम्बन्धलाई विशेष महत्व दिन थालेको स्पष्ट संकेत गर्छ। यस भ्रमणले रास्वपाको अन्तर्राष्ट्रिय कूटनीतिक छवि र स्वीकार्यतालाई थप बलियो बनाउने अनुमान विश्लेषकहरूले गरेका छन्।
स्रोतका अनुसार सभापति लामिछानेको यो भ्रमण नेपाल-भारतबीचको जनस्तरको सम्बन्ध, आपसी हित र दुई देशका राजनीतिक दलहरूबीचको बुझाइलाई थप प्रगाढ बनाउन केन्द्रित रहनेछ। दिल्ली बसाइका क्रममा उनले भाजपाका वरिष्ठ नेताहरू, भारत सरकारका उच्च मन्त्रीहरू तथा कूटनीतिक अधिकारीहरूसँग दुई पक्षीय चासोका विषयमा गहन छलफल गर्ने कार्यक्रम रहेको छ।
यसका साथै उनले नयाँदिल्लीस्थित विभिन्न प्रतिष्ठित थिंक ट्याङ्क र बुद्धिजीवीहरूसँग नेपालको वर्तमान राजनीतिक तथा आर्थिक परिदृश्यबारे विचार विमर्श गर्नेछन् भने भारतमा रहेका प्रवासी नेपालीहरू, विद्यार्थी र व्यावसायिक क्षेत्रका व्यक्तिहरूसँग भेटघाट गरी उनीहरूका समस्या र अपेक्षाबारे समेत जानकारी लिनेछन्।
नेपाल र भारतबीचको कूटनीतिक सम्बन्धलाई २१ औं शताब्दीको आवश्यकता र युवा पुस्ताको भावनाअनुरूप अगाडि बढाउन यो भ्रमण फलदायी हुने रास्वपा स्रोतले दाबी गरेको छ।
भ्रमण दलमा सभापति लामिछानेसँगै रास्वपाका अन्य केही केन्द्रीय नेता तथा कूटनीतिक मामिलाका जानकारहरूको समेत सहभागिता रहेको छ। रास्वपाले यस भ्रमणलाई नितान्त सद्भावना र परिचयात्मक भ्रमणको रूपमा व्याख्या गरे पनि यसले आगामी दिनमा नेपालको आन्तरिक राजनीति र कूटनीतिक सन्तुलनमा दूरगामी प्रभाव पार्ने देखिन्छ।
