काठमाडौं। नयाँ वर्ष विसं २०८३ मा प्रदर्शनमा आएका नेपाली चलचित्रहरू मध्ये ‘लालीबजार’ हालसम्मकै सबैभन्दा बढी कमाउने कीर्तिमानी फिल्म बनेको छ।
चलचित्र विकास बोर्डअन्तर्गतको ‘सिनेमा बक्सअफिस’ ले जेठ ९ गतेसम्मको व्यापारिक विवरण सार्वजनिक गरेसँगै यस चलचित्रको लोभलाग्दो व्यावसायिक सफलता बाहिर आएको हो।
बोर्डको आधिकारिक तथ्यांकअनुसार ‘लालीबजार’ ले घरेलु बजारबाट ५ करोड ७६ लाख ३९ हजार ४७१ रुपैयाँ संकलन गरिसकेको छ भने यसका लागि कुल १ लाख ९६ हजार ४०६ वटा टिकट बिक्री भइसकेका छन्।
गत वैशाख २५ गतेदेखि प्रदर्शनमा आएको यस चलचित्रले हलहरूमा तेस्रो साता पार गर्दा पनि दर्शकको उत्साहजनक साथ पाइरहेको छ । चलचित्रका कार्यकारी निर्माता प्रदीप भट्टराईले बोर्डले सार्वजनिक गरेको विवरण गत शनिबारसम्मको मात्र भएको खुलाउँदै हालसम्म फिल्मलाई २ लाखभन्दा बढी दर्शकले हेरिसकेको जानकारी दिएका छन् ।
मनोरञ्जनका साथै शिक्षामूलक सन्देशलाई पर्दामा उतारेका कारण दर्शकले यसलाई औधी रुचाएको उल्लेख गर्दै उनले नेपालको भव्य सफलतापछि अब छिट्टै नै विश्व बजार अर्थात् डायस्पोरामा समेत चलचित्रको प्रदर्शन सुरु गरिने बताए ।
षट्कोण आर्ट्सको ब्यानरमा निर्माण भएको यस चलचित्रलाई हेर्न अहिले सिनेमा हलहरूमा पारिवारिक दर्शकहरूको ओइरो लागिरहेको छ । निर्देशक यम थापाको कथा तथा निर्देशनमा तयार भएको यस फिल्मको पटकथा र संवाद लेखनमा निर्देशक थापालाई प्रदीप भट्टराईले संयुक्त रूपमा साथ दिएका छन् । म्याक्स दीपेश खत्री र रवीन्द्रसिंह बानियाँ निर्माता रहेको यस चलचित्रको विषयवस्तु, सन्तुलित निर्देशकीय पक्ष र कलाकारहरूको जीवन्त अभिनयको सर्वसाधारणदेखि समीक्षकसम्मले मुक्तकण्ठले प्रशंसा गरिरहेका छन् ।
विशेष गरी आमाको सङ्घर्ष र पारिवारिक सामीप्यताको कथामा आधारित यस चलचित्र हेरेर निस्कने अधिकांश दर्शकहरू भावुक बन्ने गरेका छन् । पर्दामा देखाइएको आमाको त्यागसँग आफ्नो भावना जोडिएको र कतिपय दृश्यमा आँखा रसाएको प्रतिक्रिया दर्शकहरूले दिएका छन् ।
दर्शकमाझ फैलिएको यही सकारात्मक ‘वर्ड अफ माउथ’ अर्थात् मौखिक सिफारिसका कारण आगामी दिनमा पनि चलचित्रको व्यापार अझ सुखद हुने अपेक्षा निर्माण पक्षको छ । चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, विशाल देवकोटा र प्रशंसा सुवेदी लगायतका कलाकारहरूको मुख्य अभिनय रहेको छ ।
_20250725082620.JPG)
