विदेशी नागरिक अनुगमन प्रणालीमा १,५४३ सेवा प्रदायक आबद्ध, १ लाख २५ हजार यात्रुको अभिलेख संकलन

काठमाडौँ । अध्यागमन विभागले विदेशी नागरिक अनुगमन प्रणाली (FNMIS) कार्यान्वयनको हालसम्मको प्रगतिबारे समीक्षा गरेको छ ।

आज आयोजित छलफलमा विभागले हालसम्म होटल, एजेन्सी, आन्तरिक विमान कम्पनी र विदेशी नागरिकलाई सेवा प्रवाह गर्ने १ हजार ५४३ वटा सेवा प्रदायक यस प्रणालीमा आबद्ध भएको जानकारी दिएको छ ।

प्रणालीको कार्यान्वयन र अभिलेख

समीक्षाका क्रममा यस प्रणालीमार्फत हालसम्म करिब १ लाख २५ हजार यात्रुको अभिलेख संकलन भइसकेको जनाइएको छ । विभागका अनुसार सन् २०२६ जनवरी १ देखि काठमाडौँका तारे होटलहरूमा र मार्च १ देखि विदेशी नागरिकलाई सेवा दिने सबै सेवा प्रदायकहरूमा यो प्रणाली अनिवार्य रूपमा लागू भइसकेको छ । यद्यपि, प्रणालीमा हालसम्म ९४ वटा होटल मात्र आबद्ध भएको तथ्याङ्कले देखाएको छ ।

सुरक्षा र अनुगमनको उद्देश्य
 

विभागका प्रवक्ता टीकाराम ढकालका अनुसार विदेशी नागरिकको सुरक्षा, राष्ट्रिय सुरक्षा, उनीहरूको गतिविधिको अनुगमन तथा अपराध नियन्त्रणका लागि यो प्रणाली ल्याइएको हो । "मुलुक पर्यटकीय दृष्टिकोणले सुरक्षित छ भन्ने सन्देश दिनु पनि यसको प्रमुख उद्देश्य हो," उनले भने । साना होटलहरू प्रणालीमा आबद्ध हुन नसक्नु, सचेतनाको कमी र सबै होटलहरू संघ-एसोसिएसनसँग नजोडिएका कारण आबद्ध संख्या कम देखिएकाले यसमा गम्भीर छलफल भएको प्रवक्ता ढकालले बताए ।

आगामी कदम र विकल्पहरू
 

छलफलमा होटल अनुगमन गर्ने पर्यटन विभाग र अन्य सरोकारवाला निकायहरूले अनुगमनमा तीव्रता दिने निर्णय गरेका छन् । प्रवक्ता ढकालले भने, "होटल लगायतका सेवा प्रदायकलाई प्रणालीमा आबद्ध गर्न विभिन्न स्थानमा सचेतना कार्यक्रम सञ्चालन गरिनेछ। यो राष्ट्रिय सुरक्षाको विषय भएकाले सबैलाई समेट्न विभागले अन्य उपायहरूको पनि खोजी गरिरहेको छ।"

समीक्षा कार्यक्रममा भिसा आवेदन गर्दाकै बखत पर्यटकले होटल छनोट गर्ने व्यवस्था लागू गर्ने र आन्तरिक राजस्व विभाग तथा पर्यटन विभागका सेवासँग यो प्रणालीलाई जोड्ने विकल्पहरूबारे समेत छलफल भएको थियो । कार्यक्रममा गृह मन्त्रालय, नेपाल पर्यटन बोर्ड, होटल एसोसिएसन नेपाल (HAN), होटल व्यवसायी महासंघ र पर्यटक प्रहरी लगायतका प्रतिनिधिहरूको सहभागिता रहेको थियो ।