काठमाडौँ । नेपाली कांग्रेसका सभापति गगन थापाले पार्टीका तीन प्रमुख भ्रातृ संस्थाहरूमा नयाँ नेतृत्व चयन गरेका छन्। केन्द्रीय कार्यसम्पादन समितिले दिएको अधिकार प्रयोग गर्दै सभापति थापाले नेपाल विद्यार्थी संघ (नेविसंघ), नेपाल तरुण दल र नेपाल महिला संघको अध्यक्ष नियुक्त गरेका हुन्।
नयाँ नियुक्तिअनुसार नेपाल विद्यार्थी संघको केन्द्रीय अध्यक्षमा धनकुटाकी करुणा कटुवाल चयन हुनुभएको छ भने नेपाल तरुण दलको नेतृत्व काठमाडौँका मनिष कोइरालालाई सुम्पिएको छ।
यस्तै, नेपाल महिला संघको अध्यक्षमा चितवनकी मीना खरेल नियुक्त हुनुभएको छ। लामो समयदेखि तदर्थ समिति र नेतृत्वविहीनताको अवस्थामा रहेका यी संस्थाहरूमा नयाँ नेतृत्व आएपछि कांग्रेसको भ्रातृ संगठनमा उत्साह देखिएको छ।
नवनियुक्त अध्यक्षहरूलाई निश्चित समयभित्र महाधिवेशन सम्पन्न गरी पार्टीको सांगठनिक संरचनालाई चलायमान बनाउने मुख्य जिम्मेवारी दिइएको छ।
कार्यसम्पादन समितिको म्यान्डेटअनुसार गरिएको यो नियुक्तिसँगै अब यी तीनवटै प्रमुख भ्रातृ संस्थाहरू महाधिवेशनको दिशामा अघि बढ्ने भएका छन्। तल्लो तहदेखि नै संगठनलाई सुदृढ गर्दै तोकिएको अवधिमा अधिवेशन गराउनु नयाँ नेतृत्वका लागि मुख्य चुनौती र अवसरका रूपमा हेरिएको छ।
