काठमाडौं । राष्ट्रिय स्वतन्त्र पार्टी (रास्वपा)ले आगामी स्थानीय तह निर्वाचनलाई लक्षित गर्दै १३ बुँदे उम्मेदवार छनोट रूपरेखा सार्वजनिक गरेको छ । पार्टीले वैज्ञानिक, वस्तुपरक र पारदर्शी प्रणालीमार्फत योग्य नेतृत्व चयन गर्ने उद्देश्यसहित कार्यविधि अघि सारेको जनाएको छ ।
रास्वपाका अनुसार उम्मेदवार छनोट प्रक्रिया अब भावना, पहुँच वा व्यक्तिगत प्रभावभन्दा माथि उठेर मापनयोग्य मापदण्ड, प्रमाण र तथ्यमा आधारित हुनेछ । मूल्याङ्कनदेखि अन्तिम निर्णयसम्मका सबै चरण अनिवार्य रूपमा दस्तावेजीकरण गरिने व्यवस्था गरिएको छ, जसले पारदर्शिता र परीक्षणयोग्यता सुनिश्चित गर्ने विश्वास पार्टीले लिएको छ ।
पार्टी निर्माणमा निरन्तर योगदान दिएका सदस्यहरूसँगै समाजका विभिन्न क्षेत्रमा सक्षम, अनुभवी र जनविश्वास प्राप्त व्यक्तिहरूलाई समेट्दै ‘सही व्यक्ति, सही ठाउँ’मा चयन गर्ने परिपाटी विकास गरिने रास्वपाले जनाएको छ । यसका लागि उम्मेदवार बन्न चाहने आकांक्षीलाई स्थानीय शासन, जनसेवा, नीति–निर्माण, सुशासन, सार्वजनिक वित्त र नागरिक सहभागितालगायत विषयमा पार्टीकै संयन्त्रमार्फत अनिवार्य प्रशिक्षण दिइनेछ ।
रास्वपाले स्थानीय आवश्यकता र सेवा प्रवाहलाई केन्द्रमा राख्दै नेतृत्व पहिचान गर्ने नीति लिएको छ । वडादेखि पालिकास्तरसम्मका संरचनाको अधिकार सन्तुलन गर्दै तल्लो तहबाटै लोकतान्त्रिक, सहभागितामूलक र प्रतिस्पर्धात्मक अभ्यास सुदृढ बनाउने लक्ष्य राखिएको छ ।
समावेशितालाई प्राथमिकतामा राख्दै महिला, दलित, जनजाति, मधेसी, थारू, मुस्लिम, अल्पसङ्ख्यक, अपाङ्गता भएका व्यक्ति, युवा, किसान, श्रमिक तथा अन्य विविध समुदायलाई समान अवसर उपलब्ध गराइनेछ । यसले समाजको वास्तविक बहुविविधता झल्किने नेतृत्व निर्माणमा सहयोग पुग्ने अपेक्षा गरिएको छ ।
यस्तै, उम्मेदवारको लोकप्रियता मात्र होइन, सार्वजनिक आचरण, इमानदारी, वित्तीय पारदर्शिता, स्वार्थको द्वन्द्वबाट मुक्त अवस्था र कानुनी विश्वसनीयता पनि छनोटका प्रमुख आधार हुनेछन् । स्थानीय तहमा जनविश्वास जित्न सक्ने क्षमता, संगठनात्मक दक्षता र समुदायसँगको सम्बन्धलाई समेत गहिरो रूपमा मूल्याङ्कन गरिनेछ ।
पार्टीले उम्मेदवार छनोटलाई कुनै गुट वा व्यक्तिको प्रभावमा नभई संस्थागत प्रक्रिया, पारदर्शी सिफारिस र लोकतान्त्रिक प्रतिस्पर्धामा आधारित बनाउने स्पष्ट गरेको छ । साथै, स्थानीय सरकारलाई परिणाममुखी बनाउने नेतृत्व विकास, पार्टीको मूल्य–मान्यतासँग स्थानीय नेतृत्वलाई जोड्ने र निरन्तर सुधारको प्रणाली स्थापना गर्ने लक्ष्य समेत अघि सारिएको छ ।
