काठमाडाैं। नेपाली कांग्रेसले पार्टीको अनुशासन र आधिकारिक नीति विपरीतका गतिविधिमा संलग्न रहेको आरोपमा नेता पूर्णबहादुर खड्कालाई सात दिनको समय सीमा दिएर स्पष्टीकरण सोधेको छ।
पार्टीको केन्द्रीय अनुशासन समितिले खड्कालाई पत्र काट्दै पछिल्लो समय उनले पार्टीको संस्थागत निर्णय प्रक्रियालाई चुनौती दिएको र समानान्तर गतिविधि सञ्चालन गरेको विषयमा जवाफ मागेको हो।
पार्टीले तय गरेको राजनीतिक लाइनभन्दा बाहिर गएर सार्वजनिक अभिव्यक्ति दिएको तथा संगठनभित्र गुटगत भेलाहरूलाई प्रश्रय दिएको भन्दै नेतृत्व उनीप्रति कठोर बनेको हाे।
अनुशासन समितिले पठाएको पत्रमा पार्टीको विधानको पालना नगर्नुको कारण र पार्टीलाई क्षति पुग्ने गरी गरिएका क्रियाकलापका सम्बन्धमा सात दिनभित्र चित्तबुझ्दो स्पष्टीकरण दिन निर्देशन दिइएको छ।
तोकिएको समयभित्र लिखित जवाफ नआएमा वा जवाफ सन्तोषजनक नभएमा विधानको व्यवस्था अनुसार थप कडा कारबाहीको प्रक्रिया अगाडि बढाइने चेतावनी समेत दिइएको छ। विशेष गरी पार्टीको आन्तरिक एकता कायम राख्न र अनुशासनलाई कडाइका साथ लागू गर्न भन्दै केन्द्रीय नेतृत्वले खड्काका पछिल्ला कदमहरूलाई गम्भीरतापूर्वक लिएको हो।
खड्का पक्षले भने यस कदमलाई राजनीतिक पूर्वाग्रह र फरक मत राख्नेहरूलाई दबाउने प्रयासको रूपमा चित्रण गरेको छ। पार्टीभित्र देखिएका कमजोरी सुधार्न खोज्दा उल्टै स्पष्टीकरण सोधिनु न्यायसंगत नभएको तर्क उनीहरूको छ।
यद्यपि, पार्टी संस्थापन पक्षले भने संगठनको मर्यादा र अनुशासन सबैका लागि बराबर हुने भन्दै कसैले पनि पार्टीको हित विपरीत काम गर्न नपाउने अडान लिएको छ। यो घटनाले नेपाली कांग्रेसभित्रको आन्तरिक शक्ति संघर्षलाई थप सतहमा ल्याइदिएको छ भने खड्काले दिने जवाफले नै उनको राजनीतिक भविष्य र पार्टीभित्रको समीकरणलाई तय गर्ने देखिएको छ।
