काठमाडौं । राजनीतिक विभाजन, असहमतिहरू र ध्रुवीकरण बढ्दै गएको वर्तमान सन्दर्भमा आज राष्ट्रिय एकता तथा मेलमिलाप दिवस मनाइँदै छ।
देशमा सहमति, सहकार्य र आपसी विश्वास कमजोर बन्दै गएको बेला प्रथम जननिर्वाचित प्रधानमन्त्री बीपी कोइरालाले अघि सारेको राष्ट्रिय एकता तथा मेलमिलापको नीति फेरि पनि सान्दर्भिक बन्दै गएको विश्लेषण गरिएको छ ।
यही सन्दर्भमा नेपाली कांग्रेस र यसका भ्रातृ तथा शुभेच्छुक संस्थाहरूले देशभर कार्यक्रम गरी दिवस मनाइरहेका छन्।
वि.सं. २०३३ साल पुस १६ गते तत्कालीन निरङ्कुश व्यवस्थाविरुद्ध संघर्षरत रहँदा पनि बीपी कोइरालाले राष्ट्रिय हितलाई प्राथमिकतामा राख्दै निर्वासन त्यागी स्वदेश फर्किने ऐतिहासिक निर्णय गरेका थिए।
क्षेत्रीय विखण्डनका घटनाहरू, विशेषतः सिक्किम भारतमा विलय भएको अवस्थालाई नजिकबाट नियालेका बीपीले नेपालमा पनि राष्ट्रिय एकता कमजोर हुन सक्ने खतरा औंल्याउँदै मेलमिलापको नीति अघि सारेका थिए।
शाही ‘कु’पछि जेल, निर्वासन र निरन्तर राजनीतिक दमन भोगेका कोइरालाले प्रतिशोधभन्दा संवाद र सहअस्तित्वलाई रोज्नु आजको राजनीतिक अभ्यासका लागि उदाहरणीय मानिन्छ। विमानस्थलमा ओर्लिएलगत्तै पुनः बन्दी बनाइए पनि उनले आफ्नो राजनीतिक अडानमा सम्झौता नगरेको इतिहास छ।
आजको दिवस केवल ऐतिहासिक स्मरण मात्र नभई बढ्दो राजनीतिक तनाव, संस्थागत अविश्वास र समाजिक विभाजनबीच संवाद र सहमतिका लागि आत्मसमीक्षा गर्ने अवसरका रूपमा हेरिएको छ।
नेताहरूले बीपीको मेलमिलाप नीतिलाई व्यवहारमा उतार्न सके मात्र लोकतन्त्र, राष्ट्रियता र सामाजिक सद्भाव बलियो हुने धारणा व्यक्त गरेका छन्।
