प्रतिनिधिसभा अविलम्ब पुनर्स्थापना हुन्छ, अर्को बाटो छैनः केपी ओली

काठमाडौं। नेकपा (एमाले) का अध्यक्ष केपी शर्मा ओलीले विघटित प्रतिनिधिसभा अबिलम्ब पुनर्स्थापित हुने बताएका छन् । आज (शनिबार) काठमाडौंमा आयोजित एमालेको कार्यक्रमलाई सम्बोधन गर्दै ओलीले असंवैधानिक र अनाधिकृत ढंगबाट विघटन भएको प्रतिनधिसभा पुनर्स्थापनाको विकल्प नरहेको बताएका हुन् । उनले देशभरीका नेता तथा कार्यकर्ताहरुलाई विघटित प्रतिनिधिसभाको पुनर्स्थापनाका लागि अगाडि बढ्न आग्रह गरे ।

‘अब देशमा अविलम्ब प्रतिनिधिसभाको, असंवैधानिक ढंगले, अनाधिकृत सिफारिसमा भंग भएको प्रतिनिधिसभाको अविलम्ब पुनर्स्थापना हुनुपर्छ । हुन्छ अब अर्को बाटो छैन । त्यही बाटोबाट अब देश अगाडि बढ्ने छ, अर्को बाटो छैन । कसलाई मन पर्छ कि पर्दैन, को डराउँछ, कसको सातो जान्छ ? त्यो बेग्लै कुरा हो । अब देशमा प्रतिनिधिसभाको पुनर्स्थापना एक मात्र सही समाधान हो । यो एकमात्र बाटो हो,’– उनले भने ।

साथै, अध्यक्ष अ‍ोलीले राष्ट्रपति रामचन्द्र पौडेलले आफूसँग हुँदै नभएको अधिकार प्रयोग गरेर सुशीला कार्कीको नेतृत्वमा सरकार बनाएको र उक्त अवैधानिक सरकारले गरेको सिफारिको आधारमा प्रतिनिधिसभा विघटन गरेको बताए । बलमिच्याइँ, आगजनी र तोडफोडको भरमा विघटन भएको प्रतिनिधिसभा पुनर्स्थापित भएरै छाड्ने उनको भनाइ छ ।

‘सम्माननीय राष्ट्रपतिज्यूसँग पनि नभएको अधिकार, संविधानमा नभएको अधिकार प्रयोग गर्न पाइँदैन । त्यो प्रयोग गरेर, बलमिच्याइँका साथ आगजनी, तोडफोडको भरमा विघटन गरिएको प्रतिनिधिसभा अबिलम्ब पुनर्स्थाना गर्नुपर्छ,’– उनले भने ।