जावलाखेल । ललितपुरको मंगलबारमा मृत फेला परेकी किशोरीको हत्या उनका सहोदर दाइले गरेको खुलेको छ ।
चैत २९ गते मंगलबजार, खपिनछेँ टोलको एक घरको पानीट्यांकीमा ११ वर्षीया बालिकाको शव भेटिएको छ । उनको हत्या चैत ४ गते भएको थियो । शव भने २९ गते फेला परेको हो । उनको हत्या आरोपमा उनकै १५ वर्षीय कान्छो दाइ पक्राउ परेका छन् ।
काठमाडौं उपत्यका अपराध अनुसन्धान कार्यालय, टेकुका एसपी अंगुर जिसीका अनुसार हत्या उनका दाइबाटै भएको कुरा अनुसन्धानबाट खुलेको हो । ललितपुर महानगरपालिका वडा नं १२, मंगलबजार बस्ने भगबती बोहराले ११ वर्षीय छोरी दुर्गा बोहरा चैत ४ गते राति साढे ९ बजे बाट हराएको भन्दै जिल्ला प्रहरी परिसर ललितपुरमा निवेदन दिएकी थिइन् ।
खोजतलास गर्ने क्रममा चैत २९ गते ललितपुर महानगरपालिका वडा नं ९, खपिन्हेँस्थित बाबुराजा अवालेको पुरानो घरको भुई तलामा रहेको पानी ट्याङकीमा सडेगलेको अवस्थामा बालिकाको शव फेला परेको थियो ।
काठमाडौं उपत्यका अपराध अनुसन्धान कार्यालय तथा पीआरबीसी ललितपुरको प्रहरी टोलीले जिल्ला प्रहरी परिसर ललितपुर समेतको सहयोगमा विभिन्न विधि र प्रबिधिको प्रयोग गरी अनुसन्धान गर्ने क्रममा उक्त घटनामा मृतकको १५ को १५ वर्षीय कान्छो दाईले हत्या गरेको खुल्न आएको छ ।
उनको दाईलाई प्रहरीले मंगलबजार एरियाबाट नियन्त्रणमा लिएर आवश्यक कारवाहीको लागि जिल्ला प्रहरी परिसर ललितपुर पठाइएको छ।
अघिल्लाे रात हत्या, भाेलिपल्ट शव व्यवस्थापन
चैत ६ गते जिल्ला बझाङ सुर्मा गाउँपालिका वडा नं. ०४ घर भई हाल ललितपुरको १२ मंगलबजार बस्ने मदन बोहरा र भगवती बोहराको छोरी ११ वर्षीयकी दुर्गा बोहरा चैत ४ गतेदेखि हराएको थिइन् ।
आमा भगवती बोहराले छोरी हराएको भनी खोज तलासको लागी जिल्ला प्रहरी परिसर ललितपुरमा निवेदन दिएकी थिइन् । ललितपुरको खपिन्छेस्थित बाबुराजा अवालेको ५ तल्ले घरको भुई तल्लामा रहेको प्रयोग बिहिन सिमेन्टले बनाएको पानी ट्याङ्कमा दुर्गा बोहराको लाश फेला परेको थियो ।
बाबुराजा अवालेको उक्त घरमा बोहराको परिवार भाडामा बसेका थिए । उनीहरु फागुन २५ गते त्यो घर छोडेर अन्यत्र डेरा सरेका थिए । उनीहरुले छोडेर गएपछि कोठा खाली भएको थियो । कोठा खाली भएपछि चमेली सुनारको परिवार त्यहाँ कोठा खोज्न पुगेका थिए ।
र खाली कोठामा उनीहरु बस्ने तयारी गरेको थियो । तर उनीहरुले कोठा सरेकै दिन अनौठो गन्ध आएपछि खानेपानीको ट्याङकी खोलेर हेर्दा बालिकाको शव देखेपछि प्रहरीलाई खबर गरेका थिए ।
उक्त घरमा भाडामा बस्ने अर्को चमेली सुनारको परिवार पनि चैत ०२ गते अन्यत्र डेरा सरे पश्चात सो घरमा कोही नबसी घर खाली रहेको थियो । चैत ४ गते मृतक बालिका र उनको दाजु पहिला डेरामा बस्ने गरेको अवालेको घर तर्फ जाँदै गरेको सीसीटीभी फुटेजमा देखिएको छ । दाजु बहिनीसँगै गएको फुटेज भेटिए पछि दाजुमाथि शंका लागि सोधपुछ गर्दा उसले कोठा सर्दा छुटेका कपडाहरु लिन भनि दाजु बहिनी गएकोमा सामान्य विवाद हुँदा बहिनिलाई पिटि उक्त ठाउँमा रहेको नाईलनको डोरीले पछाडिबाट घाटी कसेर भुईमा लडाई छोडी भागेको बताएका थिए।
अनुसन्धानको क्रममा दाजु बहिनिले नै लागु औषधको ट्याबलेट खाएको थियो र त्यसको नशामा आफु भएकोले त्यस्तो घटना हुन गएको कुरा बताएको एसपी जिसीले बताए । चैत ५ गते बिहान नशाले छोडेपछि आफूले हिजो बहिनिमाथि गरेको आक्रमण सम्झिएपछि घटनास्थलमा गई हेर्दा बहिनिको मृत्यु भएको र बहिनीको लाश भुई तल्लाको भर्याङको छेउमा देखे पश्चात सो लाश ट्याङ्किमा हालि सिमेन्टले बनाएको ढक्कन लगाई छोपेर छोड गएको बयानमा बताएका थिए।
