भैरहवा। रुपन्देही क्षेत्र नं. ३ का सांसद तथा राप्रपाका वरिष्ठ नेता सांसद दीपक बोहराको पार्थीव शव हेलिकप्टर मार्फत भैरहवावाट फर्काइएको छ।
राष्ट्रिय प्रजातन्त्र पार्टी (राप्रपा) का नेता तथा कार्यकर्ताहरुले भैरहवादेखि मोटरसाईकल र्यालीसहित नगर परिक्रमा गर्दै उनको शव निवाससम्म शव ल्याएकाे थियो।
निवासमा ल्याएर बोहोलाई श्रद्धाञ्जली अर्पण गरिएको थियो। श्रद्धाञ्जली अर्पण लगत्तै उनको पार्थीव शरीर पुनः काठमाडौं लगिएको छ र काठमाडौंको पशुपतिनाथमा उनको दाहसंस्कार गरिने छ।
वरिष्ठ नेता एवं पूर्वमन्त्री बोहराको उपचारको क्रममा काठमाडौंको ओम अस्पतालमा निधन भएको हो। पोस्ट कोभिड समस्याले गर्दा उनी अहिले बोल्न नसक्ने अवस्थामा थिए। उनी कोरोना महामारीको दोस्रो लहर (जेठ २०७७) मा संक्रमित भएका थिए। संक्रमणको चार/पाँच महिनापछि बोहरामा स्वरमा केही परिवर्तन देखिएको थियो। पछि थप उपचारका लागि दिल्ली पुगेका बोहरालाई चिकित्सकहरूले पोष्ट कोभिडका कारणले घाँटीमा समस्या भएको बताएका थिए।
समस्या थपिएपछि उनी केही समयपछि अमेरिकाको न्यूयोर्क पुगेका थिए। त्यसयता उनी स्पीच थेरापी गर्दै आएका थिए। पोस्ट कोभिडका कारण उनको घाँटीमा क्यान्सर भएको थियो। बोहरालाई घाटीको समस्या थियो। उनी चुनावको बेलामा पनि बोल्न नसक्ने अवस्थामा थिए। नबोलेरै उनी निर्वाचित भएका थिए। संसदमा पनि उनले बोलेनन्। उनले आफ्ना कुरा राप्रपाकै अन्य सांसदमार्फत सुनाउने गरेका थिए।
