काठमाडौं। नेकपा (एकीकृत समाजवादी) का सम्मानित नेता झलनाथ खनालले केपी शर्मा ओली नेतृत्वको तत्कालीन सरकारले जारी गरेको चुच्चे नक्सा नागपञ्चमीमा टाँस्ने नागको नक्साजस्तै भएको टिप्पणी गरेका छन् ।
आज (सोमबार) धनुषामा आयोजित पत्रकार सम्मेलनलाई सम्बोधन गर्दै उनले सरकारले चुच्चे नक्सा कार्यान्वयनका लागि कुनै पहल कदमी नलिएको भन्दै यस्तो टिप्पणी गरेका हुन् । तत्कालीन सरकारले सम्पूर्ण नेपालीहरुको देशभक्तिपूर्ण भावनालाई प्रतिनिधित्व गरेर चुच्चे नक्सा जारी गरेको हो भने सरकारले कार्यान्वयनको लागि पहल कदमी लिनुपर्ने उनको माग छ ।
‘मैले भनेको कुरा के हो भने नीतिको आधारमा, कार्यक्रमको आधारमा वाम एकता हुन्छ, टिक्छ । तर, स्वार्थको आधारमा हो भने त्यो कुनै पनि कुरा टिक्दैन । त्यो नाग पञ्चमीमा नाग टाँसेजस्तो होईन । चुच्चे नक्सा बनाएकै हो, साँच्चै दिलदेखि, सम्पूर्ण नेपालीहरुको देशभक्तिपूर्ण भावनालाई प्रतिनिधित्व गरेर बनाएको हो भने त्यसलाई कार्यान्वयन गर्नका लागि सरकारले कदम चाल्न सक्नुपर्छ । स्टेप वान, टु, थ्री गरेर । खोई त सरकारले पहल कदमी लिएको ? सरकारले पहल कदमी लिन सकिरहेको छैन । यस कारणले चुच्चे नक्सा नाग पञ्चमीमा टाँस्ने नागको नक्साजस्तै भएको छ,’ उनले भने ।
तत्कालीन प्रधानमन्त्री ओली नेतृत्वको मन्त्रिपरिषद्ले २०७७ जेठ ५ गते चुच्चे नक्सा पास गरेको थियो । जेठ ७ गते सार्वजनिक भएको उक्त नयाँ नक्सा प्रतिनिधि सभाले ३१ गते सर्वसम्मत पारित गरेको थियो । सार्वभौम संसद्ले उक्त नक्सा पारित गरेपनि सो भूमि अहिले पनि विवादित छ ।
