काठमाडौँ । संघीय संसदअन्तर्गत प्रतिनिधिसभा बैठक बस्दैछ। संसद् भवन नयाँ बानेश्वरमा बस्नेगरी बैठक दिउँसो १ बजेका लागि बोलाइएको छ।
बैठकमा उद्योग तथा वाणिज्य र श्रम तथा उपभोक्ता हित समितिका माननीय सभापति अब्दुल खानले 'विद्युतीय व्यापार विधेयक सम्बन्धी समितिको प्रतिवेदन, २०८१” पेश गर्ने कार्यसूची छ।
कानुन,न्याय तथा संसदीय मामिला मन्त्री अजय कुमार चौरसियाले कानुन, न्याय तथा मानव अधिकार समितिको प्रतिवेदन सहितको विधायन विधेयक,२०८० माथि छलफल गरियोस्' भनी प्रस्ताव प्रस्तुत गर्ने कार्यसूची रहेको छ।
यसैगरी श्रम,रोजगार तथा सामाजिक सुरक्षा मन्त्री शरत सिंह भण्डारीले "अन्तर्राष्ट्रिय श्रम संगठनको अन्तर्राष्ट्रिय श्रम सम्मेलनले स्वीकृत गरेका नयाँ अन्तर्राष्ट्रिय श्रम मापदण्डहरूको संयन्त्रहरु (महासन्धी, प्रोटोकल र सिफारिस) सम्बन्धी प्रतिवेदन " पेश गर्ने संभावित कार्यसूचीमा उल्लेख छ।
बिहीबार संघीय संसदमा सरकारले ल्याएका ६ वटा विधेयकहरू निर्णयार्थ पेश गर्ने कार्यसूची रहे पनि अन्तिम समयमा आएर कार्यसूचीबाट हटाइएको थियो। राष्ट्रियसभामा सत्ता गठबन्धनको बहुमत नपुग्ने भएपछि अध्यादेश पेश गर्ने कार्यसूची हटाइएको थियो।
जनता समाजवादी पार्टी नेपालले अध्यादेशलाई समर्थन गर्ने वा नगर्ने निर्णय नगर्दा दुवै सदनमा अध्यादेश पेश हुन सकेन। अध्यादेश पारित गराउन प्रतिनिधिसभामा सत्तारुढ कांग्रेस र एमालेसँग स्पष्ट बहुमत छ भने राष्ट्रियसभामा बहुमत पुर्याउन जसपा नेपालको साथ आवश्यक छ।
