काठमाडौँ । नेकपा (माओवादी केन्द्र) को स्थायी कमिटी बैठक पेरिसडाँडामा बसिरहेको छ । केन्द्रीय समिति बैठकको एजेण्डा तयारीका लागि माओवादी स्थायी कमिटी बैठक बसेको हो । यो बैठक ३ दिनसम्म चल्ने छ ।
बैठकमा पहिलो पटक पूर्व उपराष्ट्रपति नन्दकिशोर पुन ‘पासङ’ पनि सहभागी छन् । यससँगै उनी माओवादीको सक्रिय राजनीतिमा फर्किएका छन् । माओवादी लडाकुका कमान्डरसमेत रहेका पासङलाई पार्टी उपाध्यक्ष बनाउने अध्यक्ष पुष्पकमल दाहाल प्रचण्डले तयारी गरेका छन् ।
‘प्रचण्ड’को सचिवालयले सञ्चारमाध्यमलाई उपलब्ध गराएको तस्बिरमा पूर्व उपराष्ट्रपति पुन ‘फ्लोर’तर्फ राखिएका कुर्सीको पहिलो लहरमा बसेका छन् । माओवादी केन्द्रको पुस २१ देखि सुरु हुने केन्द्रीय समिति बैठकको तयारीबारे छलफल गर्न स्थायी कमिटी चलिरहेको छ ।
पासङ बैठकमा उपस्थित भएसँगै अन्य माओवादी नेताले चासो दिएका छन् । पासङलाई दिइने जिम्मेवारीबारेमा नेताहरूले चासो जनाइरहेका छन् ।
