काठमाडौं । कजाकिस्तानमा बुधबार दुर्घटना भएको विमानमा सवार ६७ यात्रुमध्ये २५ जनाको जिवित्तै उद्धार गरिएको छ ।
उद्धार गरिएकामध्ये २२ जनालाई उपचारका लागि अस्पताल भर्ना गरिएको कजाकिस्तानको आपत्कालीन मन्त्रालयले जनाएको छ । अजरबैजानबाट ६७ यात्रु बोकेर दक्षिणी रुसका लागि उडेको यात्रुवाहक विमान बुधबार कजाकिस्तानको सहर अक्ताउनजिकै दुर्घटनाग्रस्त भएको थियो ।
अजरबैजान एयरलाइन्सको उडान ‘जे२–८२४३’ नम्बरको विमान राजधानी बाकुबाट रूसी क्षेत्र चेचन्याको ग्रोज्नीका लागि उडेको थियो । अक्ताउबाट करिब तीन किलोमिटर (१.८ माइल) पर पुगेपछि विमानलाई आपत्कालीन अवतरण गरिएको थियो ।
आपत्कालीन अवतरण गराउने क्रममा विमान दुर्घटनामा परेको थियो । उद्धार टोली घटनास्थलमा पुग्दा विमान आगो लागेको अवस्थामा भेटिएको कजाकिस्तानको आपत्कालीन मन्त्रालयले जनाएको छ ।
विमानमा ६२ यात्रु र पाँचजना चालक दलका सदस्य रहेको कजाकिस्तानको यातायात मन्त्रालयले प्रारम्भिक रिपोर्टमा जनाएको छ । प्रारम्भिक तथ्यांकअनुसार विमानमा रहेका यात्रुमध्ये ३७ जना अजरबैजानका, ६ जना कजाकिस्तानका, तीन किर्गिस्तानका र १६ जना रुसका नागरिक रहेको बताइएको छ ।
_20241224150025.jpg)
