रोल्पा। रोल्पामा निर्माणाधीन झोलुङ्गे पुलको टेवा पर्खाल (रिटेनिङवाल) भत्किँदा पाँच जनाको मृत्यु भएको छ।
सुनछहारी गाउँपालिका वडा नम्बर ३ गाममा निर्माणाधीन झोलुङ्गे पुलको टेवा पर्खाल भत्किएको हो। जिल्ला प्रहरी प्रमुख डिएसपी भरत लामाका अनुसार मृतकमध्ये चार जनाको शव निकालिएको छ।
दुई महिला र दुई पुरूषको शव निकालिएको प्रहरीको भनाइ छ। थप एक जनाको खोजी भइरहेको उनले जानकारी दिए। टेवा पर्खाल भत्किएर उनीहरू पुरिएका थिए। मौलाबाङ र बाहिरी गाम जोड्न झोलुङ्गे पुल निर्माणको काम चलिरहेको थियो।
वडाध्यक्ष उडवीर घर्ती मगरले पाँच जनाको घटनास्थलमै मृत्यु भएको खबर आएपछि आफू घटनास्थलतर्फ गइरहेको बताए।
