काठमाडौं । स्पेनका राजा फेलिप र रानी लेटिजियामाथि अन्डा प्रहार गरिएको छ । स्पेनको बाढी प्रभावित क्षेत्र भ्यालेन्सियाको भ्रमण गर्दा राजारानीमाथि स्थानीयको आक्रोशित भीडले अन्डा प्रहार गरेको हो ।
यसै साताको विनाशकारीमा बाढीमा परेर स्पेनमा २०० जनाभन्दा बढी मानिसको मृत्यु भएको छ । राजाले भ्यालेन्सियाको भ्रमण गर्दा प्रधानमन्त्री पेड्रो सान्चेज र क्षेत्रीय गभर्नर कार्लोस माजोन पनि उनका साथमा थिए । राजारानी, प्रधानमन्त्रीले भ्रमण गर्दा आक्रोशित भीडले ‘हत्यारा’ भन्दै नाराबाजी गरेको थियो ।
बाढी प्रभावित क्षेत्रमा सरकारले खोज तथा उद्धार र राहत उपलब्ध गराउन ढिलाइ गरेको भन्दै पीडितले आक्रोश पोखेका थिए । उनीहरूले बाढी प्रभावित क्षेत्रमा फोटो खिचाउन लागेपछि आक्रोशित भीडले राजारानी, प्रधानमन्त्री र क्षेत्रीय गभर्नरविरुद्ध नाराबाजी गर्दै हिलो र अन्डाले हानेका थिए । त्यसपछि सुरक्षाकर्मीले उनीहरूलाई अन्डाबाट बचाउन छाता खोलेर छेकेका थिए ।
राजारानीले आक्रोशित भीडसँग कुराकानी गर्ने प्रयास गरेका थिए । स्पेनिस राजपरिवारको सोसियल मिडिया च्यानलले भने विरोधपछि भिडियो जारी गरेको थियो । भिडियोमा राजा र रानीले बाढी प्रभावित बासिन्दालाई अँगालो हालेको देखाइएको थियो । एक पुरुष राजाको अँगालोमा रुँदै गरेको समेत देखाइएको थियो ।
स्पेनी राजाका निम्ति यस्तो आक्रोश नजिकबाट सामना गर्नु सामान्य घटना होइन । राजा फेलिप स्पेनमा लोकप्रिय छन् । आफ्नो बुवाको त्यागपछि उनी सिंहासनमा बसेका थिए ।
भीडको धेरै आक्रोश प्रधानमन्त्री सान्चेज र क्षेत्रीय गभर्नर माजोनप्रति थियो । आक्रोशित भीडले नाराबाजी गरेपछि स्पेनका प्रधानमन्त्री छिट्टै त्यहाँबाट बाहिरिएका थिए । राजाले भने केही सयम त्यहीँ बिताएर बाढी प्रभावितसँग कुराकानी गरेका थिए ।
प्रधानमन्त्री सान्चेजको कार्यालयले सुरक्षाका कारण प्रधानमन्त्री छिटो निस्कनुपरेको स्पष्ट पारेको छ ।
