काठमाडौँ । भारतको उत्तर प्रदेशको फतेहपुरका २४ वर्षीय विकास द्विवेदीलाई डेढ महिनाभित्र सातौँ पटक सर्पले डसेको हो । भारतीय सञ्चारमाध्यमका अनुसार ३४ दिनभित्र उनलाई ६ पटक सर्पले डसेको थियो ।
बिहीबार सातौँ पटक उनलाई सर्पले डसेको छ । अहिले उनको अवस्था गम्भीर रहेको जनाइएको छ । उनलाई एक निजी अस्पतालको सघन उपचार कक्षमा राखेर उपचार गरिएको भारतीय सञ्चारमाध्यमले जनाएका छन् ।
विकासका अनुसार तेस्रो पटक सर्पले डसेपछि उनले सपनामा सर्पलाई देखेका थिए । आफूलाई छैटौँ पटक डसेपछि मात्र उनले आफूलाई सपनामा सर्पले भनेको कुरा सार्वजनिक गरेका थिए ।
आफूलाई सपनामा सर्पले नवौँ पटकसम्म डस्ने चेतावनी दिएको उनको भनाइ थियो । ८ पटकसम्म डस्दा बाँच्ने तर नवौँ पटक डसेपछि कुनै पनि हालतमा नबाँच्ने चेतावनी आफूलाई सर्पले दिएको उनले बताएका थिए ।
बिहीबार उनलाई सातौँ पटक सर्पले डसेको हो । यसबिचमा उनले सर्पको डसाइबाट जोगिनका लागि आफ्नो घर छोडेर कहिले सानीआमाको घर, कहिले काकाको घरमा बस्ने गरेका थिए । तर सानीआमाको घरमा जाँदा होस् या काकाको घरमा जाँदासमेत उनी सर्पबाट जोगिन सकेनन् ।
