युरोप । पछिल्ला दशकयता मुलधारको राजनीतिमा नेवार समुदायको स्थान नगन्य रहेको भन्दै अभियन्ताहरु चिन्तित बन्न थालेका छन् । उनिहरुले ०४६ साल अघिका विभिन्न कालखण्डमा नेवार समुदायका नेताहरुले राजनीति स्थान पाएपनि पछिल्ला दशकमा स्थान नपाएको गुनासो गरेका हुन् ।
नेवार समुदायको पहिचान र राजनीतिलाई थप उजागर गर्ने गरी अभियान सुरु गरिएको छ । अभियानको पहिलो चरणको कार्यक्रम अन्तर्गत नेवार समुदायबाट राजनैतिक मैदानमा पुगेका सत्तारुढ दल नेकपा, प्रतिपक्ष नेपाली कांग्रेस र जनता समाजवादी पार्टीका नेताहरुसँग अन्तरक्रिया गरेको अभियन्ता गंगा बहादुर नेमकुलले जानकारी दिए । उनका अनुसार नेकपाकी नेत्री अष्टलक्ष्मी शाक्य, कांग्रेस नेता भिमसेनदास प्रधान र जनता समाजवादी पार्टीका राजेन्द्र प्रसाद श्रेष्ठसँग राजनैतिक चुनौती, आगामी कार्यदिशा लगायतका विषयमा कुराकानी भएको थियो ।
नेवाः पहिचान, नेवाः राजनीति अभियान पोर्चुगलको आयोजनामा भएको कार्यक्रम १७ अक्टोबर शनिबारका दिनदेखि सुरु भएको हो । कार्यक्रम राष्ट्रिय नेवाः खल इजरायलको समन्वयमा भएको हो । नेवार समुदायका नेताहरु सम्मिलित उक्त कार्यक्रमलाई नमस्ते नेपाल हातेमालो सामाजिक संजाल समन्वय समिति इजरायलबाट संचालित रेडियो कार्यक्रम रेडियो नमस्ते नेपालबाट प्रत्यक्ष प्रसारण गरिएको थियो ।
प्राचिन नेपालका शासकको रुपमा कहलिएका महिषपाल, गोपाल, किराँत, लिच्छवी र मल्ल समुदायको अवशेषहरु हालसम्म पनि नेवार समुदायमा यत्रतत्र छरीएर रहेको अभियन्ता नेमकुलको भनाई छ । उनले गोपालवंशी शासकहरुको विस्तृत विवरण नभेटाइए तापनि तिनीहरु नेवार समाजकै एक अभिन्न अंग हुन भन्ने कुरा निर्विवाद रहेको बताउँछन् । उनले ०४६ साल अघि नेवार समुदायको राजनीतिमा रहेको बर्चस्व आगामी दिनमा पनि निरन्तर हुनुपर्ने बताए ।
अहिले अभियानमा विभिन्न ११ वटा देशका नेवार समुदायका प्रतिनिधीहरुले साथ दिएको उनले जानकारी दिए । आगामी दिनमा नेवार समुदायका अन्य युवा नेताहरुसँग पनि अन्तरक्रिया गर्ने कार्यक्रम रहेको बताइएको छ । कार्यक्रममा राष्ट्रिय नेवाः खल इजरायलका नरेश नेवाः श्रेष्ठ, अध्यक्ष बिमला श्रेष्ठ, कार्यक्रम संचालकद्वय मनु श्रेष्ठ र राजकुमारी श्रेष्ठ, प्रविधीमा सहयोग गर्ने विष्णु सिन्खदा र नमस्ते नेपाल हातेमालो सामाजिक संस्था समन्वय समिति इजरायलले सहयोग गरेका थिए ।
_20230723112730.jpg)
