काठमाडाैं। राष्ट्रिय जनता पार्टी राजपाले सरकारले आफूहरुले उठाउँदै आएका माग सम्बाेधनमा गम्भीरता नदेखाए सरकारले ल्याएकाे संविधान संशाेधन विधेयकमा पनि समर्थन गर्न कठिन हुने जनाएकाे छ ।
शुक्रबार गैर सरकारी विधेयकको रुपमा आफ्ना मागहरु समेटेर संविधान संशोधनको प्रस्ताव लिएर संसद सचिवालय पुगेका राजपा नेताहरुले यस्ताे चेतावनी दिएका हुन् । तर सचिवालयले उनीहरुकाे विधेयक दर्ता गर्न मानेन ।
विधेयक दर्ता नभएपछि आक्रोशित बनेको राजपा नेता महन्थ ठाकुरले अब नयाँ नक्सा अनुसार निशान छाप परिवर्तन गर्न ल्याइएकाे संविधान संशोधन विधेयकको पक्षमा उभिन पनि कठिन हुने उनको भनाइ छ ।
'कांग्रेस र माओवादी सरकार भएका बेला मधेशका लागि संविधान संशोधन गर्ने गरि जुन संशोधन आएको थियो। त्यसबेला एमालेले भोट नदिदाँ अगाडि बढेन। त्यसैलाई फेरि लिएर आएका हाैं । तर खाेइ माथिबाट के आदेश आयाे दर्ता भएन,' उनकाे भनाइ छ ।
आफूहरुले सर्वदलीय बैठकमा पनि आफ्ना कुरा प्रस्टसँग राखिसकेको भन्दै ठाकुरले आफ्ना मागमा जनताको भावना जोडिएको भन्दै सँगै लिएर जानु पर्ने कुरा पटक पटक राखेको दाबी गरे । उनले भने,'यसलाई सम्बोधन गरेर संशोधन मार्फत् हामीहरुको जे समस्या छ त्यसलाई समाधान गर्नुहोस् यदि भएन भने जनता आक्रोशित हुन्छ, मधेश आक्रोशित हुन्छ। हाम्रो भनाई थियो । आक्रोशित जनता राष्ट्रिय एकताको पक्षमा जाँदैन।'
सरकारले पटक पटक आफूहरुको माग सम्बोधन गर्छौं भनेर झुटो आस्वासन दिएको भन्दै अब संवाद पनि कठिन हुने बताए ।
सीमा विवादको विषय देशका अन्य ठाउँमा पनि भएको भन्दै भने, 'विवाद अरु ठाउँमा पनि छ। कालपानी, लिम्पियाधुरामा मात्र छैन। त्यो कुराहरु पनि अब उठ्छ। सुगौली सन्धीमा धेरै कुरा आएको छैनु । त्यो कुरा अब उठ्छ। त्यो पनि विवादको विषय बन्छ अब। छोड्दैनौँ हामी।'
