काठमाडौं सरकारले संघीय संसद्मा पेस गरेको नीति तथा कार्यक्रममा विवादित एमसीसीको विषय समावेश गरेकोमा नेपाल कम्युनिस्ट पार्टी (नेकपा) का नेता भीम रावलले आपत्ति जनाएका छन् । पार्टीले कुनै पनि निर्णय लिन नसकेको विषयलाई सरकारले चोर बाटोबाट नीति कार्यक्रममा समावेश गरेको भन्दै रावलले आपत्ति जनाएका हुन् ।
नीति तथा कार्यक्रममा पेस गरेको बुँदा नम्बर २११ मा लप्सेफेदी रातमाटे हेटौंडा र लप्सेफेदी रातमाटे दमौली-बुटवल चार सय केभी प्रसारण लाइनको विषयमा रावलले आपत्ति जनाएका हुन्। उक्त परियोजना एमसीसी र नेपाल सरकारबीच भएको सम्झौतामा पनि उल्लेख छ। उक्त सम्झौतामा उल्लेख भएको विषयलाई सरकारले नीति कार्यक्रममा समावेश गरेकोमा उनले आपत्ति जनाएका हुन्।
