काठमाडौंः सरकारले भारतले एकतर्फी रुपमा नेपाली भूभाग लिपुलेक हुँदै चीनको मानसरोवर जोड्ने सडक बनाएकोमा आपत्ति जनाएको छ । परराष्ट्र मन्त्रालयले विज्ञप्ति जारी गर्दै उक्त कदमलाई दुई देशका प्रधानमन्त्रीबीच भएको सहमति विपरीतको कदम भनेको छ । शुक्रबार उक्त सडकको उद्घाटन भएपछि सबै क्षेत्रबाट आलोचना भइरहेको छ ।
परराष्ट्रले दुई देशबीचको सीमा विवादबारेको विषय विचाराधीन रहेको अवस्थामा एकतर्फी रुपमा सडक बनाइएकोमा आपत्ति जनाएको हो । सीमा विवादबारे दुई पटकसम्म सचिवस्तरीय बैठकका लागि प्रस्ताव गर्दा भारत छलफलका लागि तयार नभएको पनि जनाइएको छ । विवादबारे कूटनीतिक नोट पठाइसकिएको पनि विज्ञप्तिमा जनाइएको छ ।
विज्ञप्तिमा भारतको कदम यसअघि दुई देशका प्रधानमन्त्रीबीच भएको समझदारीको विरुद्ध भएको उल्लेख छ । सुगौली सन्धिमा महाकाली नदीको पूर्वक्षेत्र नेपालको भूभाग भएकोबारे पनि स्मरण गराइएको छ । सीमा विवाद ऐतिहासिक दस्तावेज प्रमाणका आधारमा हल हुनुपर्ने पक्षमा नेपाल रहेको परराष्ट्रको विज्ञप्तिमा उल्लेख छ ।
विज्ञप्तिमा नेपाल भारत प्रवुद्ध व्यक्ति समूहको प्रतिवेदन बुझ्न नेपाल तयार रहेको उल्लेख गर्दै प्रतिवेदनका आधारमा विवाद हल हुनुपर्नेमा जोड दिइएको छ ।
