काठमाडौं। बाढी तथा पहिरोका कारण गण्डकी र कर्णाली प्रदेशका मुख्य राजमार्गहरूमा यातायात आवागमन गम्भीर रूपमा प्रभावित भएको छ। नेपाल प्रहरीले आज बिहान ६:३० बजे सार्वजनिक गरेको विवरण अनुसार गोरखा र सुर्खेतका विभिन्न सडक खण्डहरू पूर्ण तथा आंशिक रूपमा अवरुद्ध रहेका छन्।
भर्खरै आएको बाढीका कारण गोरखाको आरुघाट गाउँपालिका वडा नं. २, ३ र ९ स्थित नयाँपुल क्षेत्रमा सडक बन्द भएको छ। सोतीमा रहेको फलामे पुल र आरुघाटबाट धादिङ जोड्ने मुख्य राजमार्ग हालसम्म पूर्ण रूपमा अवरुद्ध रहेको छ। यद्यपि, आरुघाट गाउँपालिका-९ नयाँपुलस्थित गोरखा-धादिङ जोड्ने सडक खण्डमा भने हाल साना सवारी साधनहरू मात्र एकतर्फी सञ्चालनमा ल्याइएको प्रहरीले जनाएको छ।
त्यसैगरी, कर्णाली प्रदेशको सुर्खेतस्थित बराहताल गाउँपालिका-७ औँलिसेमा ठूलो पहिरो खस्दा कर्णाली राजमार्ग प्रभावित भएको छ। पहिरो पन्छाउने काम जारी रहेकाले हाल उक्त राजमार्गमा एकतर्फी रूपमा मात्र सवारी साधनहरू सञ्चालन भइरहेका छन्। सडक पूर्ण रूपमा सुचारु गराउन स्थानीय प्रशासन र प्रहरी टोली खटिएका छन्।
