काठमाडौँ। सरकारले विगतका वर्षहरूमा दशैँ–तिहारलाई मात्र लक्षित गरी सञ्चालन गर्दै आएको सहुलियत पूर्ण (सुपथ) मूल्य पसल यस वर्ष भने झन्डै एक महिनाअघि नै सञ्चालनमा ल्याएको छ। खाद्य तथा व्यापार कम्पनी लिमिटेडले उपभोक्तालाई राहत दिने उद्देश्यका साथ आजदेखि देशका ४४ जिल्लाका १९३ स्थानमा सुपथ मूल्य पसल सञ्चालन गर्न लागेको हो।
कम्पनीको सातौँ वार्षिकोत्सवको अवसर पारेर सिंहदरबारभित्र पनि आजैदेखि नयाँ बिक्री कक्ष सञ्चालनमा आउँदै छ। चाडपर्व नजिकिँदै गर्दा बजारमा दैनिक उपभोग्य वस्तुको माग बढ्ने र अस्वाभाविक मूल्य वृद्धि हुन सक्ने अवस्थालाई रोक्न विगतभन्दा छिट्टै यी पसलहरू सुरु गरिएको कम्पनीले जनाएको छ। दशैँ–तिहारको मुख्य खरिद अवधि सुरु हुनुअघि नै सहुलियत पसल खुलाउँदा आम उपभोक्ताले लामो समयसम्म छुट दरमा खाद्यान्न खरिद गर्न पाउने अपेक्षा गरिएको छ।
सुपथ मूल्य पसलहरूमार्फत चामल, दाल, गेडागुडी लगायतका अत्यावश्यक खाद्य वस्तुमा प्रतिकिलो तथा प्रतिलिटर ५ रुपैयाँसम्म छुट उपलब्ध गराइनेछ।
चाडपर्वका लागि धेरै परिमाणमा खाद्यान्न खरिद गर्ने परिवारका लागि यो छुटले घरायसी खर्च कम गर्न प्रत्यक्ष सहयोग पुग्ने विश्वास लिइएको छ। देशका विभिन्न भौगोलिक क्षेत्रहरू समेटिने गरी १९३ ठाउँमा पसल सञ्चालन हुने भएकाले दुर्गम तथा सुगम दुवै क्षेत्रका उपभोक्ताले सरकारी सहुलियतको प्रत्यक्ष लाभ लिन सक्नेछन्।
