काठमाडौं । सिङ्गापुर राष्ट्रिय क्रिकेट मैदानमा आइतबार सम्पन्न एशियन गेम्स पुरुष क्रिकेट छनोट प्रतियोगिता २०२६ को पहिलो सेमिफाइनल खेलमा नेपालले ओमानमाथि ८ विकेटको सानदार जित दर्ता गरेको छ।
टस हारेर पहिले ब्याटिङको निम्तो पाएको ओमानलाई १९.४ ओभरमा मात्र ९४ रनमा अलआउट गरेपछि नेपालले ९५ रनको सामान्य लक्ष्य पाएको थियो। उक्त लक्ष्यलाई नेपाली ब्याटरहरूले आक्रामक ब्याटिङको मद्दतले मात्र ९.२ ओभरमा २ विकेट गुमाउँदै सहजै प्राप्त गरे। यस जितसँगै नेपाल अपराजित रहँदै प्रतियोगिताको फाइनलमा प्रवेश गर्न सफल भएको छ।
नेपालको जितमा ब्याटर लोकेश बमले विस्फोटक इनिङ्स खेले। उनले मात्र २६ बलको सामना गर्दै ७ चौका र १ छक्काको मद्दतले अविजित ४४ रन जोडे। त्यस्तै, कप्तान रोहित पौडेलले २० बलमा २१ रन बनाउँदै लोकेशलाई बलियो साथ दिए भने कुशल भुर्तेलले तीव्र गतिमा ८ बलमा २० रनको योगदान दिए।
ओमानका बलर समीर उथमानले २ विकेट लिए पनि नेपाली टोलीको रन गतिलाई रोक्न सकेनन्। यसअघि बलिङतर्फ करण केसीले ३ तथा सोमपाल कामी र सन्दीप लामिछानेले २–२ विकेट लिएर ओमानलाई सस्तैमा समेट्न मुख्य भूमिका खेलेका थिए।
यो जितसँगै नेपालले आगामी एशियन गेम्सको मुख्य प्रतियोगिताका लागि आफ्नो बलियो दावेदारी प्रस्तुत गरेको छ।
