काठमाडौँ । प्रमुख तीन दल नेपाली कांग्रेस, नेकपा एमाले र नेकपा माओवादी केन्द्रका शीर्ष नेताको बैठक सोमबार बस्दै छ । सिंहदरबारमा अपराह्न ४ बजे बैठक बस्ने तय भएको एक नेताले जानकारी दिए ।
हुलाकी मार्ग केन्द्रित तराई मधेस जागरण अभियानमा रहेका प्रमुख प्रतिपक्ष दलका नेता तथा पुष्पकमल दाहाल प्रचण्ड छलफलका लागि आज काठमाडौँ आउने भएका छन् ।
बैठकमा संक्रमणकालीन न्याय (टीआरसी) बारे छलफल हुने बताइएको छ । चैत ६ गते प्रतिनिधिसभा बैठकमा नेकपा माओवादी केन्द्रकी सांसद विमला सुवेदीले टीआरसीको विषयमा सोधिएको प्रश्नको उत्तरमा प्रधानमन्त्री केपी ओलीले प्रचण्डसँग सम्पर्कको प्रयास भइरहेको जवाफ दिएका थिए ।
ओलीले बेपत्ता पारिएका व्यक्तिको छानबिन आयोग र सत्य निरूपण तथा मेलमिलाप आयोगका पदाधिकारी नियुक्ति प्रक्रिया यथाशक्य छिटो सुरु गरी शान्ति प्रक्रियाको बाँकी काम टुंग्याउन सरकार प्रतिबद्ध रहेको बताएका थिए ।
यस विषयमा प्रचण्डसँग सम्पर्क गर्न खोजिरहेको तर पटक–पटक प्रयास गर्दा ‘स्वास्थ्यमा केही समस्या भएको हुनाले सम्पर्क गर्न नसक्नु भएको’ भन्ने जवाफ पाएको सदनलाई जानकारी गराएका थिए ।
यसअघि टीआरसीको विषयमा छलफल गर्न चैत ४ गते प्रधानमन्त्री ओलीका विज्ञ सल्लाहकार अग्नि खरेल खुमलटार पुगेका थिए ।
टीआरसी बाहनामा पूर्वराजाको सक्रियताबारे छलफल
तीन शीर्ष नेताबीच पूर्वराजा ज्ञानेन्द्र शाहको सक्रियता र उत्पन्न परिस्थितिबारे पनि छलफल हुने बताइएको छ । पछिल्लो समय व्यवस्था विरोधीहरु सडकदेखि सदनसम्म सक्रिय भएका छन् । राजतन्त्र ल्याउने भन्दै राजावादीहरुले अन्दोलन चर्काउने तयारी गरेपछि शीर्ष नेताहरु चिन्तित देखिएका हुन् ।
प्रधानमन्त्री ओलीले पूर्वराजालाई गिरफ्तार गर्नुपर्ने आन्तरिक बैठकहरुमा बताउँदै आएका छन् । यसबारे ओलीले आज कांग्रेस र माओवादी केन्द्रको धारणा बुझ्ने भएका छन् ।
साथै प्रचण्डले भनेजस्तो सहमतिको सरकार र पछिल्लो समय बढेको बैदेशिक हस्तक्षेपका बारेमा पनि शीर्ष नेताबीच छलफल हुन लागेको बालुवाटर स्रोतले बताएको छ ।
