काठमाडौं । जनकपुरबाट काठमाडौंका लागि उडेको बुद्ध एयरको जहाजको चक्का (ल्यान्डिङ गियर) फुस्किएको छ ।
बिहीबार बेलुकी काठमाडौंका लागि उडेको बुद्ध एयरको ९ एन- एएनएच कलसाइनको जहाजको चक्का फुस्किएको काठमाडौं अवतरण गरिसकेपछि मात्रै खुलेको हो ।
जनकपुरबाट ४:४५ मा काठमाडौंका लागि उडेको युफोर ५०६ उडान नम्बरको जहाजको चक्का फुस्किएको नागरिक उड्डयन प्राधिकरणका प्रवक्ता ज्ञानेन्द्र भुलले बताए । जहाज त्रिभुवन अन्तर्राष्ट्रिय विमानस्थलमा सकुशल अवतरण भएको उनले जानकारी दिए ।
उनले भने, ‘पोस्ट फ्लाइट जाँच गर्दा नोज ल्याडिङ गियरको एउटा टायर भेटिएन । टायर नभेटिएपछि जनकपुर एयरपोर्टमा खोज्न लगाइयो र जनकपुरको एयरपोर्टको रनवेमा भेटिएको छ।’ उनका अनुसार अहिले जहाजलाई ग्राउन्डेड गरेर आन्तरिक छानबिन भइरहेको छ । जहाजमा ६२ यात्रु सवार थिए । उनीहरु सबै सुरक्षित रहेको बताइएको छ ।
