काठमाडौं । स्वतन्त्र विद्यार्थी युनियन (स्ववियु) को निर्वाचन प्रक्रिया आजदेखि शुरू हुँदैछ। त्रिभुवन विश्वविद्यालयले आज संघ, संगठन र समूह दर्ता गरी निर्वाचन प्रक्रिया शुरू गर्न लागेको हो।
आज दिउँसो ३ बजेसम्म संघसंस्था र समूह दर्ता प्रक्रिया शुरू गर्ने गरी सबै क्याम्पसमा तालिका पठाइसकेको त्रिविले जनाएको छ। त्रिवि विद्यार्थी कल्याण तथा खेलकुद निर्देशनालयका अनुसार सबै क्याम्पस निर्वाचन समितिले प्रक्रिया शुरू गर्नेछन्।
यसअघि नै सार्वजनिकि कार्यतालिका अनुसार फागुन २१ गते बिहान १० बजे मतदाता सूची प्रकाशन, २५ गते मतदाता सूचीउपर दाबी विरोध, सोही दिन बेलुकी ५ बजे अन्तिम नामावली प्रकाशन हुनेछ।
यसपछि २६ गते मनोनयनपत्र वितरण गर्ने, २७ गते समानुपातिक र प्रत्यक्षतर्फको मनोनयन दर्ता, २८ गते प्रत्यक्ष समानुपातिकतर्फको उम्मेदवारको दाबी विरोध र सोही दिन बेलुकी ५ बजे उम्मेदवारको दाबी विरोधउपर छानबिन गरी अन्तिम नामावली प्रकाशन गर्ने तालिका रहेको छ।
यस्तै, २९ गते दिउँसो १ बजेसम्म उम्मेदारको नाम फिर्ता लिई अन्तिम नामावली प्रकाशन हुनेछ। उम्मेदवारले प्रचारप्रसार गर्ने समय फागुन २९ गते दिउँसो २ बजेदेखि चैत २ गते राति १२ बजेसम्मलाई तोकिएको छ। त्यसपछि मौन अवधि शुरू हुनेछ । कार्यतालिकाअनुसार चैत ५ गते बिहान ८ देखि ४ बजेसम्म मतदान हुनेछ।
