काठमाडौँ । युक्रेन युद्ध अन्त्य गर्ने उद्देश्यले साउदी अरेबियामा अमेरिका र रुसबीच वार्ता सुरु भएको छ ।
युद्ध सुरु भएको तीन वर्षपछि यसलाई रोक्ने प्रयाससहित पहिलोपटक प्रत्यक्ष भेटवार्ता भएको हो । वार्तामा रुसी विदेशमन्त्री सर्गेई लाभरोभ र अमेरिकी विदेशमन्त्री मार्को रुबियो सहभागी छन् । यद्यपि, युक्रेन वा युरोपबाट कसैलाई पनि आमन्त्रित गरिएको छैन ।
यसबीच क्रेमलिनले आवश्यक परे राष्ट्रपति पुटिनले युक्रेनसँग वार्ता गर्ने बताएका छन् । अमेरिकाले यो वार्ता रुस युद्ध अन्त्य गर्न गम्भीर छ कि छैन भनेर पत्ता लगाउने पहिलो कदम भएको बताइएको छ भने रुसले अमेरिकासँगको सम्बन्ध सामान्य बनाउने आशा राखेको बताएको छ ।
तर, युक्रेनी राष्ट्रपति भोलोडिमिर जेलेन्स्कीले युक्रेनलाई समावेश नगरी आफ्नो देशले कुनै पनि सम्झौता स्वीकार नगर्ने बताएका छन् । युरोपेली नेताहरू पनि वार्तामा सामेल हुन चाहन्छन् र सोमबार आपत्कालीन बैठक बोलाएका छन् ।
बेलायती प्रधानमन्त्री केयर स्टारमरले यदि दिगो शान्ति सम्झौता भएमा युक्रेनमा बेलायती सेना पठाउने विचार गर्ने बताएका छन्, तर अन्य देशहरूले अहिलेसम्म यस विषयमा उदासीनता देखाएका छन् ।
_20250331104000.jpg)
