काठमाडौँ । सेयर बजारले आज पनि ओरालो यात्रालाई निरन्तरता दिएको छ। सेयर कारोबार साताको दोस्रो दिन नेप्से परिसूचक दोहोरो अंकले घटेर बन्द भएको छ। नेप्से परिसूचक १०.९८ अंकले घटेर २६७७.९८ विन्दुमा अडिएको छ।
अघिल्लो दिन आइतबार पनि नेप्से दोहोरो अंकले घटेको थियो। सो दिन ८ अर्ब बराबरको सेयर कारोबार भएको थियो। नेप्से परिसूचक घटेसँगै कारोबार कम पनि ओरालो लागेको छ। आज ३२२ स्क्रिप्सको १ करोड ४४ लाख ४३ हजार ७६५ कित्ता सेयर ६ अर्ब ९६ करोड २ लाख ९२ हजार २३५ रुपैयाँमा खरिदबिक्री भए।
दुई कम्पनीको सेयर सकारात्मक सर्किट लेभलमा कारोबार भयो। न्यादी हाइड्रोपावर र गार्डियन माइक्रो लाइफ इन्स्योरेन्सको सेयर १० प्रतिशतले बढेको हो। दुई कम्पनीको सेयर १० प्रतिशतले बढ्दा दुई कम्पनीको सेयर १० प्रतिशतले ओरालो लाग्यो। बोटलर्स नेपाल र अपकार लघुवित्त वित्तीय संस्थाको सेयर १० प्रतिशतले घटयो।
कारोबार रकमका आधारमा नेपाल रिपब्लिक मिडिया शीर्ष स्थानमा रह्यो। सो कम्पनीको २४ करोड ४४ लाख मूल्य बराबरको सेयर कारोबार भयो। सीईडीबी होल्डिङ्सको १५ करोडको सेयर कारोबार हुँदा सप्तकोशी डेभलपमेन्ट बैंकको १४ करोड र नेपाल रिइन्स्योरेन्स कम्पनीको १३ करोड मूल्य बराबरको सेयर कारोबार भयो।
कारोबारमा आएकामध्ये ७७ स्टक्सको मूल्य बढ्दा १६१ वटाको घट्यो। ६ स्टक्सको मूल्य भने स्थिर रह्यो। दुई समूहबाहेक अन्य समूहको उपसूचक नकारात्मक देखिएका छन्।