काठमाडौं। रिपोर्टर्स क्लब नेपालका सभापति ऋषि धमलाले सहकारी ठगी प्रकरणमा कांग्रेस–एमालेका नेता बचाउने काम नगर्न चेतावनी दिएका छन् । समसामयिक विषयमा रिपोर्टर्स क्लबमा आयोजित साक्षत्कार कार्यक्रमलाई सम्बोधन गर्दै सभापति धमलाले कांग्रेस उपसभापति धनराज गुरुङ र एमाले नेता ऋषिकेश पोखरेललाई पनि सहकारी ठगी प्रकरणमा अनुसन्धानको दायरामा ल्याउनुपर्ने बताएका हुन् ।
‘सहकारी ठगी प्रकरणमा कांग्रेस एमालेका नेताहरुलाई बचाउने काम नगरौं । राष्ट्रिय स्वतन्त्र पार्टीका सभापति रवि लामिछानेमाथि अनुसन्धान जारी छ । अदालतले एउटा निर्णय गर्छ । तर, धनराज गुरुङ र ऋषिकेश पोखरेललाई खोई अनुसन्धान ? कांग्रेस, एमालेका नेताहरुलाई पनि अनुसन्धान गर्नुपर्यो,’– उनले भने ।
प्रतिनिधि सभाअन्तर्गतको सार्वजनिक लेखा समितिका सभापतिसमेत रहेका पोखरेल र कांग्रेस उपसभापति गुरुङ दुवै जना श्रीमतीका कारण विवादमा तानिएका छन् । कांग्रेस उपसभापति गुरुङकी पूर्व श्रीमती ज्योति गुरुङले ललितपुरस्थित मितेरी बचत तथा ऋण सहकारीको बचत रकम हिनामिना गरेको र सो कार्यमा धनराजको पनि संलग्नता रहेको आरोप छ ।
त्यस्तै, सार्वजनिक लेखा समितिका सभापतिसमेत रहेका पोखरेकी श्रीमती अञ्जला कोइरालामाथि उमागौरी कृषि सहकारी संस्थाको बचत रकम अपचलन गरेको आरोप छ । सो कार्यमा ऋषिकेशको पनि संलग्नता रहेको भन्दै प्रश्न उठिरहेको छ ।
