काठमाडौं। राष्ट्रिय प्रजातन्त्र पार्टी (राप्रपा) का वरिष्ठ नेता पशुपति शमशेर जबराले मुलुक बनाउन र विकास गर्न आम नेपाली एकजुट हुनुपर्ने बताएका छन्। राष्ट्र रक्षार्थ, एकता, अभियान काठमाडौंले आयोजना गरेको चियापान तथा भेटघाट कार्यक्रममा बोल्दै वरिष्ठ नेता जबराले राष्ट्रलाई जोगाउन सबै एकजुट हुनुपर्ने बताएका हुन्।
उनले भने, ‘बुद्धको देश, विश्वको सर्वोच्च शिखर सगरमाथा भएको देश, सीतामाताको देश र मुक्तिनाथ भएको देश हो, हामीले हाम्रो मुलुक जोगाउन एकजुट हुनुपर्छ।’ नेतृत्व तहमा इमान्दारिताको खडेरी भएको बताउँदै नेता जबराले भने ‘हामीसँग विकास गर्न सबै चिज छ, नभएको केही छैन तर नेतृत्व गर्ने तहमा इमान्दारिताको खडेरी छ। सबैले इमान्दारिता देखाउन जरुरी छ।’
कार्यक्रममा राप्रपाका उपाध्यक्ष रवीन्द्र मिश्रले ७८ वर्षका राजाले देशभरी राजसंस्थाको पक्षमा माहोल बनाउँदै जाने र हामी आफूलाई राजसंस्थावादी भन्नेहरूले हाम्रा स्वार्थ र अहंका कारण त्यो माहोल विगार्दै जाने काम भइरहेको बताए।
‘देशभरी राजसंस्थाको पक्षमा माहोल हुँदा हामी किन त्यसलाई मुर्त रूप दिन सकिरहेका छैनौँ?राजस्थावादी पार्टी तथा समूहहरूले आत्मसमीक्षा गर्नुपर्ने समय आएको छ’, उनले भने। कार्यक्रममा बोल्दै विश्वको भूराजनीति जसरी बद्लिएको छ अब नेपालमा राजसंस्था आवश्यक रहेको देखिएको पनि बताए । उनले राजावादीहरु एक ठाउँमा आग्रह समेत गरे।
कार्यक्रमपछि राप्रपा नेपालका अध्यक्ष कमल थापाले राष्ट्र रक्षार्थ एकता अभियान“द्वारा काठमाडौंमा आयोजित कार्यक्रम उत्साहजनक जनाउदै भ्रष्ट व्यवस्था र भ्रष्ट शासकबाट देशलाई मुक्त तुल्याउन तथा संवैधानिक राजसंस्था र हिन्दुराष्ट्र स्थापना गर्न सम्पूर्ण राष्ट्रवादी शक्तिहरूलाई एकतावद्ध गर्ने कार्यमा राप्रपा नेपालको निशर्त सहयोग रहनेछ बताएका थिए ।
कार्यक्रममा राष्ट्र रक्षार्थ, एकता, अभियानका महासचिव अवकाश प्राप्त महासेनानी प्रकाशजंग कार्कीले नेताहरुको गल्तीले गर्दा विश्वसामू मेरो देश खोजी देउ भनेर भिख माग्नुपर्ने अवस्था आउने बताए । उनले सबै स्वार्थ छाडेर देश बचाउन आग्रह गरेका थिए । उनले राष्ट्र रक्षार्थ, एकता, अभियान कुनै पनि पार्टीसँग आवद्ध नभएको बताएका थिए । कार्यक्रममा संयोजक मिरा राणा लगायतका अभियान्तहरुले आफ्नो धारणा राखेका थिए ।
_20241020152337.png)
