काठमाडौं । काठमाडौंको न्यूनतम तापक्रम आज यस वर्षकै सबैभन्दा कम मापन भएको छ । आज काठमाडौंको न्यूनतम तापक्रम ५ दशमलव ४ डिग्री सेल्सियस रहेको मौसमविद् मन्जु बासीले बताइन् । हिजोको न्यूनतम तापक्रम ५ दशमलव ६ डिग्री सेल्सियस थियो । आज अधिकतम तापक्रम पनि १९ देखि २१ डिग्री सेल्सियसम्म रहने अनुमान गरिएको छ । न्यूनतम र अधिकतम तापक्रम घट्दा बिहान बेलुका चिसो बढ्दै गएको छ । रातिको मौसम सफा हुँदा न्यूनतम तापक्रम घट्छ भने बादल लाग्दा अधिकतम तापक्रम घट्छ ।
देशका धेरै ठाउँमा अहिले हुस्सु, कुहिरो लागेको छ । अहिले बिहान लागेको हुस्सु, कुहिरो बिस्तारै हट्दै गइ घाम लाग्ने मौसमविद् मन्जु बासीले जानकारी दिइन् । अहिले तराई क्षेत्रमा पनि बिहान बाक्लो हुस्सु लाग्ने क्रम बढेको छ । अब पहाडी जिल्लामा हुस्सु पनि बढ्दै जाने मौसमविद् बासीले बताइन्।
उनका अनुसार आज काठमाण्डौसहित देशका धेरै ठाउँको मौसम आंशिक बद्ली रहने छ । यस्तै, भोलि भने पश्चिमी क्षेत्रमा बादल लाग्ने सम्भावना रहेको मौसमविद्को भनाइ छ ।
_20240428201615.jpg)
