काठमाडौं । सभामुख अग्नी सापकोटाविरुद्ध मुद्दाको सुनुवाइ आज पनि नहुने भएको छ। सर्वोच्च अदालतको बुधबारको संवैधानिक इजलासमा मुद्दाको पेशी तोकिएको थियो। तर अदालत प्रशासनले मुद्दाको सुनुवाइ नमिल्नेमा राखेको जनाएको छ। इजलासमा सो मुद्दाको पेशी पटकपटक चढाइएपनि सुनुवाइ हुन सकेको छैन।
प्रधानन्यायाधीश चोलेन्द्र शमशेर राणाको अध्यक्षतामा न्यायाधीशहरु दीपककुमार कार्की, मीरा खड्का, हरिकृष्ण कार्की, ईश्वरप्रसाद खतिवडासहितको संवैधानिक इजलासमा उक्त मुद्दा पेसी चढाइएको थियो ।
द्वन्द्ध कालमा काभ्रेका अर्जुन लामाको हत्यामा संलग्न रहेको आरोपमा सभामुख सापकोटाविरुद्ध मुद्दा परेको थियो । यसअघि गत भदौ १६ गते पनि उक्त मुद्दामा पेसी तोकिएको थियो तर ‘हेर्न नमिल्ने’ सूचीमा राखिएको थियो । भने त्यसअघि २०७६ फागुन ३० गते समेत पेसी तोकिए पनि हेर्न नमिल्नेमा सूचीमा राखिएको थियो ।
२०६४ सालमा अर्जुन लामाकी पत्नी पूर्णिमाया लामाले २०६४ सालमा सापकोटाविरुद्ध कारबाहीको माग राख्दै जाहेरी दिएका थिइन् । २०६२ साल वैशाख १६ गते काभ्रेको श्रीकृष्ण मावि, दाप्चामा अभिभावक भेलाबाट लामाको अपहरण भएको थियो । लामालाई सोही वर्षको साउनमा ज्यूँदै खाल्डोमा पुरेर मारेको आरोप सापकोटामाथि रहेको छ ।
_20241127162555.jpg)
