काठमाडौं । नेकपा महासचिव विष्णु पौडेल र स्थायी कमिटी सदस्य एवं प्रदेश ५ का मुख्यमन्त्री शंकर पोखरेल लामो समयदेखि प्रधानमन्त्री एवं नेकपा अध्यक्ष केपी शर्मा ओलीका सारथि हुन् ।
ओलीले निकै विश्वास गर्ने र ओलीलाई हरदम साथ दिने यी दुई नेतालाई ओलीको दाहिने हात नै भन्दा पनि फरक नपर्ला ।
ईश्वर पोखरेल समेत ओलीकै पक्षमा भएपनि उनलाई ओलीले त्यति विश्वास गर्दैनन्, जति यी दुई नेता र पूर्व सभामुख सुवास नेम्वाङ लगायतलाई गर्छन् ।
तत्कालीन एमालेका महासचिव ईश्वर पोखरेललाई साइड लगाएर नेकपामा विष्णु पौडेललाई महासचिव बनाएको पनि यही कारण हो ।
पार्टी एकतामा निकै ठूलो भूमिका खेलेका पौडेललाई प्रचण्डले पनि मन पराएकै थिए, सोही कारण उनी महासचिव बन्न सफल भए ।
शंकर पोखरेल भने प्रदेशमा थन्किए । प्रदेशको मुख्यमन्त्री नै भए पनि राष्ट्रिय राजनीतिको दृष्टिकोणले उनी पछाडि पर्ने चिन्तामा थिए ।
यता विष्णु पौडेलको प्रभाव पार्टीमा बढ्दै नै गयो ।
ओलीको मात्र होइन पौडेलले प्रचण्ड-माधव नेपाल खेमाको पनि मन जिते । सर्वस्वीकार्य बने पौडेल ।
उनको यो राइज पूर्व एमाले खेमामा ईश्वर पोखरेल, शंकर पोखरेललगायत लगायत प्रतिस्पर्धीलाई फिटिक्कै मन परेको थिएन ।
शंकर पोखरेलसँग त उनको अर्को एउटा टसल पनि थियो- प्रदेश ५ को राजधानी ।
पौडेल बुटवलमै प्रदेश राजधानी कायम हुनुपर्ने पक्षमा छन् भने मुख्यमन्त्री समेत रहेका पोखरेल गृहजिल्ला दाङमा ।
यसबीचमा नेकपा निकै ठूलो विवादको भूमरीमा फस्यो । झण्डैझण्डै फूटको मुख्यमा पुग्यो ।
यही मौकालाई शंकर पोखरेलले सदुपयोग गरे । विष्णुको समन्वयकारी भूमिकाका कारण ओलीलाई नितान्त आफ्नो कुरा सुन्ने र आफूले भनेअनुसार मात्र गर्ने विश्वास पात्रको खाँचो थियो ।
मुख्यमन्त्रीको जिम्मेवारी र कामकाज छाडेर उनी लामो समय काठमाडौं बसे । ओलीका सन्देश लिएर कहिले खुमलटार त कहिले कोटेश्वर धाए ।
खुमलटार पार्टी अध्यक्ष प्रचण्ड र कोटेश्वर वरिष्ठ नेता माधव नेपालको निवास हो ।
पार्टीको पछिल्लो विवाद समाधानमा पोखरेलको पनि भूमिका रह्यो ।
यसबीचमा पनि विष्णु पौडेल सबैका साझा देखिए भने शंकर पोखरेल ओलीका नितान्त सहयोगी ।
अनि जुट्यो दाङमा सहमति
प्रदेश ५ को राजधानी दाङ हुनुपर्छ भन्नेमा पूर्व माओवादी खेमा एकजुट नै थियो । दाङको भालुवाङ जनयुद्ध कालमा माओवादीको किल्ला नै मानिन्थ्यो ।
यसमा नजिकको रुकुम/रोल्पाको सेन्टिमेन्ट पनि जोडिएको छ ।
प्युठानबाट बर्दिया झरेका वामदेव गौतमले पनि टाढाको बुटवलभन्दा नजिकको दाङ नै रोज्ने भए ।
वरिष्ठ नेताद्वय माधव नेपाल र झलनाथ खनाललाई यसमा खासै लिनुदिनु थिएन, तर सचिवालयमा दाङकै पक्षमा बहुमत रहेकाले उनीहरू पनि त्यसैमा सकारात्मक थिए ।
बाँकी रहे ओली, ईश्वर पोखरेल र विष्णु पौडेल ईश्वरले टाढाकै भएपनि थर मिल्ने नेता शंकरलाई नै साथ दिए । विष्णु बुटवलका पक्षमा थिए भने ओलीको कित्ता क्लियर थिएन ।
'पछिल्लो काठमाडौं बसाइका क्रममा शंकरले ओली कमरेडको मन जिते अनि प्रदेश ५ को यो लडाईंमा दाङको पक्षमा प्रधानमन्त्रीज्यूलाई ल्याउन सफल भए,' ओली निकट स्रोतले भन्यो ।
यसबीचमा बालुवाटारमा कोरोनाले कब्जा जमाएका बेला पनि ओलीले प्रचण्डलाई बोलाए, अनि दाङलाई प्रदेश राजधानी बनाउने प्रस्ताव गरे ।
ओलीको यो प्रस्ताव प्रचण्डलाई मन नपर्ने कुरै भएन । सहमति जुटिहाल्यो ।
त्यसपछि उनीहरूले शंकर पोखरेललाई आफूहरूबीचको सहमति सुनाए र त्यही अनुसार प्रस्ताव ल्याउन भने ।
शंकरले चाहेको नै यही थियो । तत्काल प्रस्ताव तयार भैहाल्यो ।
अहिले यही विषयले बुटवलमा तनाव छ । प्रदेश सभामा सोमवार तोडफोड भयो ।
कांग्रेस सांसदहरूको नाराबाजीका बीच प्रस्ताव अगाडि बढेको छ ।