रुपन्देहीको मणिग्रामस्थित क्रिमसन अस्पतालमा उपचारका क्रममा मृत्यु भएका गुल्मीका ४१ वर्षीया शिक्षकका आफन्तले उनको मृत्यु कोरोना भइरसका कारण भएकामा आशंका गरेका छन् ।
ती शिक्षकको बिहीबार बिहान ७ बजेर १० मिनेटमा मृत्यु भएको अस्पतालले जनाएको छ । गुल्मी मदाने गाउँपालिका–६ का कुँवर थरका उनी जण्डिस र निमोनियाबाट ग्रस्त थिए । उनलाई गाउँबाट १ जेठमा अर्घाखाँचीसम्म मोटरसाइकल र त्यहाँबाट मणिग्रामसम्म एम्बुलेन्समा ल्याइएको थियो । अस्पतालमा भर्ना हुँदा उनलाई ज्वरो आउने र टाउको दुख्ने समस्या थियो । गाउँमै बसेका र बाहिरबाट आएका मानिसको सम्पर्कमा नगएका उनको स्वाब परीक्षणमा कोरोना पोजेटिभ देखिएपछि परिवार आश्चर्यचकित भयो ।
परिवार र आफन्तले मृतकमा कोरोना संक्रमण नै हो भन्ने पत्याउन सकिरहेका छैनन् । ‘घरमा बस्नुभएको थियो । बाहिरबाट आएका मानिससँगको सम्पर्कमा गएको पनि थाहा छैन’, बुटवलमा रहेका उनका आफन्तले टेलिफोनमा भने, ‘कोरोना नै हो भन्नेमा शंका छ ।’
अस्पतालले भने उनमा कोरोना संक्रमण भएको जनाएको छ । मृतकका एक आफन्तले बताएअनुसार उनलाई अर्घाखाँचीबाट अस्पतालसम्म ल्याउने एम्बुलेन्स भारतबाट आएर क्वारेन्टाइनमा बसेकाहरु ओसार्न प्रयोग भएको थियो । एम्बुलेन्सबाट संक्रमण भएको हो कि भन्ने एकथरिको आशंका छ ।
तर, अर्काथरि भने अस्पतालको लापरबाहीले त्यस्तो भएको दाबी गर्छन् । भारतबाट आएर क्वारेन्टाइनबाट भागेका रुपन्देही मर्चवारका एक युवक र मृतकको थ्रोट स्वाब एकैपटक संकलन गरिएको थियो ।
मर्चवारका युवकसँग मृतकको स्वाबको नमुना साटिएको आशंका पनि आफन्तलाई छ । ‘यस्तो कुरा बाहिर भन्दा कसैले पत्याउँछन् कि पत्याउँनन् थाहा छैन, तर नमुना अर्कैको हुन सक्ने शंका छ’, एक आफन्तले भने ।
प्रदेश ५ सरकारका सामाजिक विकास मन्त्रालयका स्वास्थ्य महाशाखा प्रमुख एवं कोरोना फोकल पर्सन डा। उमासंकर चौधरीले आरोप स्वीकार गर्न तयार छैनन् । ‘नमुना साटिएको भन्ने आरोप गलत हो’, उनले भने, ‘त्यस्तो हुनै सक्दैन ।’
यसअघि मृत्यु भएकी सिन्धुपाल्चोककी महिलाको मृत्यु पनि कोरोनाबाट भएको हो भन्नेमा आशंका गरिएको छ । बाँकेमा कोरोनाबाट मृत्यु भएका युवक र उनको लक्षण नमिल्नुले पनि महिलाको मृत्यु कोरोनाबाट नभएको आशंकालाई बल पुर्याएको छ ।
