भारतले कोरोना परीक्षणका लागि नेपाललाई उपहारस्वरूप ३० हजार व्यक्तिको जाँच क्षमताको पिसिआर टेस्ट किट सहयोग गरेको छ । आइतबार भारतीय राजदूत विनयमोहन क्वात्राले स्वास्थ्यमन्त्री भानुभक्त ढकाललाई किट हस्तान्तरण गरेका हुन् ।
यसअघि १० वैशाखमा पनि भारतले २३ टन औषधि नेपाललाई हस्तान्तरण गरेको थियो । माइल्याबले उत्पादन गरेको सो किट नेपाली जनताका लागि उपहारस्वरूप प्रदान गरिएको भारतीय दूतावासद्वारा जारी विज्ञप्तिमा उल्लेख छ ।
औषधि र परीक्षण किटको हस्तान्तरणले कोभिड–१९ महामारीले निम्त्याएको साझा चुनौतीविरूद्ध तयार रहन, सामना गर्न तथा एकसाथ लड्न दुई देशका नेता एवं जनताबीचको जारी सहकार्यलार्ई दर्शाएको दूतावासले जनाएको छ ।
नेपालमा अहिलेसम्म झन्डै दुई लाख पिसिआर किट्स मौज्दात भइसकेको छ । केही दिनअघि मात्र स्विस राजदूतले नेपाललाई ३० हजार थान किट्स सहयोग गरेको थियो । त्यसअघि चीनबाट पनि पिसिआर किट्स आइसकेको छ ।
