सिन्धुपाल्चोक बाह्रिविसेको चालिसेगाउँकी एक महिलाको कोरोना भाइरसका कारण काभ्रेको धुलिखेल अस्पताल मृत्यु भएपछि चालिसेगाउँ सिल गर्ने तयारी गरिएको छ । सिन्धुपाल्चोक खतराको केन्द्र बन्ने संकेत देखिएसँगै चालिसेगाउँ शिल गर्ने तयारीस्वरुप जिल्ला प्रशासन कार्यालय चौतारामा बैठक जारी रहेको छ ।
स्वासप्रश्वासमा समस्या देखिएपछि उपचारका लागि अस्पताल भर्ना भएकी सिन्धुपाल्चोक बाह्रबिसेकी २९ वर्षकी महिलाको बिहिबार निधन भएको थियो । उपचारको क्रममा उनको आरडीटी रिपोर्ट पोजिटिभ आएको थियो ।
ती महिला ९ दिनअघि काठमाडौंको त्रिवि शिक्षण अस्पतालमा सुत्केरी भएकी थिइन् । त्यसपछि उनलाई सिन्धुपाल्चोक बाह्रबिसेस्थित घर लगिएको थियो । बिहिबार अचानाक स्वासप्रश्वासमा समस्या भएपछि उनलाई काभ्रेको धुलिखेल अस्पताल पुर्याइएको थियो । अस्पताल पुर्याइएको १ घण्टा नबित्दै उनको निधन भएको थियो ।
उनको मृत्युपछि धुलिखेल अस्पताल पनि सिल गरिएको छ । नेपालमा कोरोना संक्रमितको संख्या २७८ पुगेको छ भने ३६ जना उपचारपछि घर फर्किएका छन् ।
