गोरखा । बजारमा प्रतिकिलो ३० देखि ३५ सम्ममा पाइने नुन गोरखाको उत्तरी भेगका विकट गाउँमा भने २०० रुपैयाँसम्म पर्छ । सडक सञ्जालको पहुँच नहुँदा ढुवानीमा लाग्ने चर्को खर्चका कारण चुमनुब्री गाउँपालिकाका बासिन्दाले दैनिक उपभोग्य वस्तुका साथै नुन समेत महँगो मूल्यमा किन्नुपर्ने बाध्यता छ ।
नेपालमा नुनको आपूर्ति गर्दै आएको साल्ट ट्रेडिङ कर्पोरेसनले आयो नुनको मूल्य प्रतिकिलो २६, न्यु शक्ति नुनको २० र भानु नुनको नौ रुपैयाँ तोकेको छ । तर, हिमालपारिको चुमनुब्री गाउँपालिकाका विभिन्न बस्तीमा आयो नुनको मूल्य प्रतिप्याकेट ६० देखि २०० रुपैयाँसम्म पर्ने गरेको छ । गाउँ जति विकट छ, नुनको मूल्य पनि त्यति नै बढी छ ।
मनास्लु क्षेत्रअन्तर्गत तिब्बती सीमावर्ती सामागाउँ र साम्दोमा प्रतिप्याकेट आयो नुनको मूल्य २०० पर्छ । तल्लो क्षेत्रमा ३० मा पाइने एक प्याकेट नुन साम्दोसम्म पुर्याउन ढुवानीमै १०० रुपैयाँ खर्च हुने स्थानीय निमा दोर्जेले बताए ।
“पाङसिङबाट साम्दोसम्म एक पोका नुन ल्याउँदा ढुवानी भाडा मात्रै १०० पर्छ । आरुघाट र आर्खेटबाट पाङसिङसम्मको ढुवानी खर्च छुट्टै छ । त्यसपछि पसलेले पाँचदेखि १० रुपैयाँ नाफा राख्दा एक पोका नुनको मूल्य २०० पुग्छ,” उनले भने ।
सामागाउँभन्दा केही तल वडा नम्बर–२ को ल्होगाउँमा खाद्यान्न ढुवानी भाडा प्रतिकिलो ८० पर्ने भएकाले एक प्याकेट आयो नुनको मूल्य १५० लिने गरिएको छ । चुमनुब्री–५, बिहीमा भने प्रतिप्याकेट १०० रुपैयाँमा नुन पाइने स्थानीय काल्देन छेवाङले बताए ।
“पाङसिङदेखि बिहीसम्म खच्चडबाट सामान ढुवानी गर्दा हिउँदमा प्रतिकिलो २५ भाडा लाग्छ । त्यति बेला नुनको मूल्य १०० पर्छ,” उनले भने, “वर्षायाममा ढुवानी भाडा प्रतिकिलो ७० सम्म पुग्छ । त्यसानुसार सामानको मूल्य पनि बढ्छ ।”
वडा नम्बर–४, प्रोकमा पनि ढुवानी खर्चका आधारमा प्रतिकिलो नुनको मूल्य १०० देखि १७० रुपैयाँसम्म पर्ने स्थानीयवासीले बताएका छन् । यस्तै, चुम उपत्यकाका अन्तिम बस्ती छुले र निलेका बासिन्दाले एक प्याकेट आयो नुनको १८० देखि २०० रुपैयाँसम्म तिर्ने गरेका छन् । पाङसिङबाट डेढदेखि दुई दिनको पैदल दूरीमा रहेका ती बस्तीमा खच्चडबाट सामान ढुवानी गर्दा प्रतिकिलो ६० भाडा लाग्ने गरेको छ । त्यहाँबाट केही वर रहेको लामागाउँसम्म ५५ र छेकम्पारको छेकम गाउँसम्म प्रतिकिलो ५० ढुवानी भाडा पर्ने लामागाउँका पासाङ फुन्जो लामाले जानकारी दिए । छेकम्पारका गाउँबस्तीमा एक प्याकेट आयो नुनको मूल्य १५० पर्छ ।
गाउँपालिका–६, चुम्लिङमा भने एक प्याकेट आयो नुनको १०० पर्ने स्थानीय गोपाल लामाले बताए । पाङसिङबाट चुम्लिङसम्म खाद्यान्न ढुवानी गर्दा प्रतिकिलो ३० रुपैयाँ भाडा लाग्ने उनको भनाइ छ ।
सरकारले विकट हिमाली क्षेत्रका बासिन्दालाई सहुलियत दरमा नुन उपलब्ध गराउन ढुवानी अनुदान कार्यक्रम सञ्चालन गर्दै आएको छ । उक्त कार्यक्रमको व्यवस्थापनको जिम्मेवारी साल्ट ट्रेडिङ कर्पोरेसनले पाएको छ । साल्ट ट्रेडिङले चालु आर्थिक वर्षमा उत्तरी गोरखाको सिर्दिबासका निम्ति ३५० क्विन्टल आयो नुन पठाएको कर्पोरेसनका गण्डकी प्रदेश प्रमुख सागर शेरचनले जानकारी दिए ।
“उत्तरी गोरखाको मागअनुसार कर्पोरेसनले आयो नुन पठाउँछ । हामीले यहाँबाट प्रतिकिलो २८ का दरले नुन पठाएका हुन्छौँ,” उनले भने, “पोखराबाट सिर्दिबाससम्म नुन ढुवानी गर्ने ठेकेदारलाई सरकारले ढुवानी खर्च उपलब्ध गराउँछ ।”
सरकारले ढुवानी अनुदान दिएर पठाएको नुन उत्तरी गोरखाका सबै विकट बस्तीमा पुग्न सकेको छैन । अनुदानको नुन सिर्दिबास क्षेत्रमै खपत हुने गरेको चुमनुब्री–७, छेकम्पारका पासाङ फुन्जो लामाले बताए ।
“सरकारले जगतसम्म नुन पुर्याउन ढुवानी अनुदान दिन्छ । त्यहाँबाट सामागाउँ र साम्दो पुग्न चार दिन तथा छेकम्पार पुग्न तीन दिन लाग्छ । त्यसैले हामीले चर्को खच्चड ढुवानी भाडा तिर्नैपर्छ,” उनले भने ।
चुमनुब्री गाउँपालिका–३, सिर्दिबासबाहेक अरू ६ वटा वडा अझै सडक सञ्जालको पहुँचबाट टाढा छन् । सडक पुगेको गाउँपालिकाको केन्द्र फिलिम र आसपासका क्षेत्रमा पनि प्रतिप्याकेट आयो नुनको मूल्य ६० रुपैयाँ पर्ने स्थानीय कुमारी गुरुङले बताइन् । आर्खेटबाट फिलिमसम्म खाद्यान्न आइपुग्दा ढुवानी खर्चका कारण मूल्य बढ्ने गरेको उनको भनाइ छ ।
मोटर पुगेको वडा नम्बर–३, पाङसिङभन्दा माथिका बस्तीमा खाद्यान्न ढुवानीको मुख्य साधन खच्चड हो । खच्चडबाट मनास्लु क्षेत्रको अन्तिम बस्ती सामागाउँ र साम्दोसम्म खाद्यान्न पुर्याउँदा प्रतिकिलो १०० रुपैयाँ ढुवानी भाडा लाग्ने सामागाउँका व्यवसायी वीरबहादुर लामाले जानकारी दिए । तीन दिनको पैदलयात्रापछि गाउँमा पुग्ने खाद्यान्नको ढुवानी खर्च प्रतिकिलो १०० पर्ने उनको भनाइ छ ।
