काठमाडौँ । बंगालको खाडीबाट उठेको शक्तिशाली ‘अर्नब’ चक्रवातको प्रभावका कारण नेपालका प्रमुख राजमार्ग तथा यातायात प्रणाली गम्भीर जोखिममा पार्ने अनुमान छ । जल तथा मौसम विज्ञान विभाग र सम्बद्ध निकायहरूका अनुसार चक्रवातका कारण मुलुकका कोशी, बागमती र नारायणी नदी जलाधार क्षेत्रमा भारी वर्षा भई सडक यातायात तथा आवागमन प्रभावित हुने देखिएको छ।
विशेषगरी पहाडी तथा भिरालो भू-बनोट भएका क्षेत्रहरूबाट गुज्रिने सडक खण्डमा बाढी, पहिरो र सडक भासिने जोखिम अत्यधिक बढेको अनुमान छ।
मौसममा आएको अचानक परिवर्तनसँगै नदी तथा खहरे खोलामा जलसतह तीव्र गतिमा बढ्ने अनुमान गरिएको छ। यसले गर्दा नदी किनारका सडक कटानमा पर्ने, कल्भर्ट तथा पुलहरूमा क्षति पुग्ने र ठाउँ-ठाउँमा ढुङ्गा खसेर बाटो अवरुद्ध हुने सम्भावना छ।
जोखिमका दृष्टिकोणले नारायणगढ-मुग्लिन सडक खण्ड (त्रिशूली र नारायणी नदी किनार) सबैभन्दा संवेदनशील बनेको छ। यसका साथै कोशी राजमार्ग, सिद्धार्थ राजमार्ग, कान्ति राजमार्ग र अरनिको राजमार्गका विभिन्न खण्डहरूमा समेत पहिरोको उच्च जोखिम छ। विगतमा पहिरोको इतिहास रहेका तथा बागमती जलाधार क्षेत्रसँग जोडिएका नदी किनारका सडकहरूमा यात्रा थप चुनौतीपूर्ण हुने देखिन्छ।
सडक सञ्जालमा आउने यस्तो अवरोधले सर्वसाधारणको आवागमन मात्र नभई अत्यावश्यक वस्तु तथा खाद्यान्न ढुवानीमा समेत प्रत्यक्ष असर पार्ने अनुमान छ ।
विपद्को सम्भावनालाई मध्यनजर गर्दै बाढी पूर्वानुमान महाशाखा तथा भौगर्भिक एवम् जल उत्पन्न विपद् अनुसन्धान शाखाले विशेष सतर्कता अपिल जारी गरेका छन्। सम्भावित क्षतिबाट बच्न अत्यावश्यक कामबाहेक वर्षाको समयमा यात्रा नगर्न सर्वसाधारणलाई आग्रह गरिएको छ।
-1200x560_20261028124317.jpg)
