काठमाडौं। तीन राष्ट्रको संयुक्त आयोजनामा भइरहेको विश्वकप फुटबल प्रतियोगिताअन्तर्गत समूह 'डी' को उद्घाटन खेलमा घरेलु टोली अमेरिकाले सुखद सुरुआत गरेको छ। अमेरिकाको लस एन्जलस स्टेडियममा आज भएको खेलमा घरेलु टोलीले पाराग्वेलाई ४-१ को फराकिलो गोलअन्तरले पराजित गरेको हो।
खेलमा अमेरिकाले सुरुआती अग्रता पाराग्वेको आत्मघाती गोलबाट पाएको थियो। खेलको सातौँ मिनेटमा अमेरिकाका वेस्टन म्याकेनीले गरेको प्रहारलाई रोक्ने प्रयास गर्दा पाराग्वेका खेलाडी डेमियन बोबाडिल्लाले आफ्नै गोलपोष्टमा बल छिराउन पुगेका थिए।
त्यसपछि आक्रामक बनेको अमेरिकाका लागि खेलको ३१औँ मिनेटमा फोलारिन बालोगुनले गोल गर्दै अग्रता दोब्बर बनाए। बालोगुनले नै पहिलो हाफको अतिरिक्त समयमा उत्कृष्ट प्रदर्शन गर्दै टोलीका लागि तेस्रो तथा व्यक्तिगत दोस्रो गोल थपेपछि पहिलो हाफमै अमेरिका ३–० ले अगाडि रह्यो।
दोस्रो हाफमा पाराग्वेले पुनरागमनको प्रयास गर्दै खेलको ७३औँ मिनेटमा मौरिसियोमार्फत एक सान्त्वना गोल फर्काए पनि त्यो पर्याप्त हुन सकेन। खेलको दोस्रो हाफको अतिरिक्त समयमा अमेरिकाका जियोभानी रेयनाले गोल गर्दै टोलीको ४–१ को सानदार जित सुनिश्चित गरे। यस जितसँगै महत्वपूर्ण तीन अङ्क जोड्दै अमेरिका समूह 'डी' को शीर्ष स्थानमा उक्लिएको छ। यस समूहमा अमेरिकासँगै पाराग्वे, अस्ट्रेलिया र टर्की रहेका छन्।
