काठमाडौं। सहकारी ठगी प्रकरणमा प्रहरी हिरासतमा रहेका रास्वपाका सभापति रवि लामिछानेलाई पार्टीका उपसभापति डा.स्वर्णिम वाग्लेले भेटेका छन्। आज (सोमबार) उपसभापति वाग्लेले जिल्ला प्रहरी कार्यालय कास्कीको हिरासतमा पुगेर लामिछानेसँग भेटवार्ता गरेका हुन् । लामिछाने गत कार्तिक २ गतेदेखि प्रहरी हिरासतमा छन्।
हिजोमात्रै कास्की जिल्ला अदालतले लामिछानेलाई अझै १३ दिन हिरासतमा राखेर अनुसन्धान गर्न अनुमति दिएको छ। सभापति लामिछानेलाई भेटेर बाहिरिने क्रममा उपसभापति वाग्लेले राजनीतिक दलहरुले प्रतिशोध साँधेको दाबी गरे। प्रतिशोधकै कारण लामिछानेलाई यति लामो समय हिरासतमा राखिएको उनले बताए।
राजनीतिक प्रतिशोध साँध्न रवि लामिछानेलाई अनावश्यक हिरासतमा राखिएको छ। हामीले न्यायिक अनुसन्धानको विरोध गरेका छैनौं,’ उनले भने।
उपसभाति वाग्लेले सभापति लामिछानेलाई प्रतिशोध साँधेर हिरासतमा राखिँदा नागरिकमा रास्वपाप्रति सहानुभूति बढेको बताए। उनले अब रास्वपाले दोस्रो चरणको आन्दोलन सुरु गर्ने पनि सुनाए।
