नेकपा (एकीकृत समाजवादी) का सम्मानित नेता एवं पूर्वप्रधानमन्त्री झलनाथ खनालले जननेता मदनकुमार भण्डारी र जीवराज आश्रितको हत्या गरेर नदीमा फालिएको
बताएका छन्।
बिहीवार पार्टी केन्द्रिय कार्यालय आलोकनगरमा ३१ औं मदन–आश्रित स्मृति दिवसलाई सम्बोधन गर्दै उनले मदन भण्डारीको शव सग्लो हुनु, नदीमा खसेर मरेको व्यक्तिको फोक्सोमा पानी जमेको नहुनुले पनि भण्डारीलाई मारेर पछि नदीमा दुर्घटनाका रुपमा फालिएको दाबी गरे।
‘मदन भण्डारी र जीवराज आश्रितले लोकतन्त्र र कम्युनिष्ट आन्दोलनको लागि सम्पूर्ण जीवन समर्पित गर्नुभएको छ। उहाँहरूले नेपालको कम्युनिष्ट आन्दोलन नयाँ उचाईमा उठाउनका निम्ति लगातार प्रयत्न गरिरहनुभएको थियो,’ खनालले भने, ‘लोकप्रिय ढंगले उहाँहरू नेपाली जनताको बीचमा स्थापित भइरहनुभएको थियो। त्यस्ता नेताहरूको असाध्यै षड्यन्त्रपूर्ण ढंगले र रहष्यपूर्ण ढंगले हत्या भएको हो।’
उनले मदन—आश्रितको मृत्यु दुर्घटनाबाट नभइ निर्ममतापूर्वक गरिएको हत्या भएको पनि बताए। ‘आजसम्म आउँदा कयौँ मानिसहरुले यसलाई दुर्घटना भने तर यथार्थमा भन्ने हो भने त्यो निर्ममतापूर्वक गरिएको हत्या हो। कुनैपनि पाखाबाट खनिएको बाटोमा गइरहेको गाडी मुग्लिनबाट नारायणघाटबाट गइरहेको गाडी भित्तातिरबाट हिँड्छ, भित्ताबाट हिँडेको गाडी कसरी खोलातिर खस्न सक्छ,’ खनालले शंका गर्दै भने, ‘के संसारको कुनैपनि ठाउँमा यस्ता घटना भएका छन्, कुनै तथ्यले यो पुष्टि गर्न सक्दैन। यो षड्यन्त्रपूर्ण हत्या हो भन्ने पुष्टि हुन्छ। लक भएको गाडीबाट उहाँहरुको शव कसरी बाहिर गयो। ३० वर्ष होस् की सय वर्षपछि होस्, हत्या हत्या नै हो, अपराध अपराध नै हो। त्यो जीपबाट खसाएर मारिएको होइन, त्यो भन्दा अघि नै मारिएको हो भन्ने स्पष्ट छ।’
नेता खनालले मदन भण्डारी र जीवराज आश्रितले लोकतन्त्र र कम्युनिष्ट आन्दोलनको लागि सम्पूर्ण जीवन समर्पित गरेको स्मरण गरे।
