विश्व स्वास्थ्य सङ्गठन ‘डब्लुएचओ’ले नयाँ प्रकारको कोरोना भाइरसको कारण सन् २०२० भन्दा २०२१ झन् कठिन हुने चेतावनी दिएको छ । कोरोना भाइरसको उक्त नयाँ प्रकार पहिलोभन्दा धेरै संक्रामक रहेको विवरणका बीच डब्लुएचओको यस्तो चेतावनी आएको हो ।
उच्च संक्रामक क्षमताको ब्रिटेनमा देखा परेको भाइरस ५० वटा देश र क्षेत्रहरूमा फैलिसकेको छ । सुरुमा बेलायतमा देखिएको जस्तै अफ्रिकामा पनि अघिल्लो प्रकारको भाइरसभन्दा छिटो विस्तार हुन सक्ने क्षमता रहेको छ । जापानमा पत्ता लगाएको अर्को नयाँ प्रकारको भाइरसले नयाँ चिन्ता थपेको छ । जापानमा चारजनामा त्यस्तो किसिमको भाइरसको संक्रमण पहिचान भएको छ । ती मानिसहरू ब्रजिलमा संक्रमित भएको बताइएको छ ।
स्पेनमा पनि भाइरसको नयाँ प्रकार देखिएको बताइएको छ । नयाँ प्रकारको भाइरसले अरू प्रकारका कोरोनाभाइरसलाई तीव्र गतिमा विस्थापित गरिरहेको छ । साथै यसमा देखिएको उत्परिवर्तनले भाइरसको महत्वपूर्ण मानिएका भागमा परिवर्तन गरेको छ ।
साथै प्रयोगशालामा गरिएका परीक्षण यस्ता केही परिवर्तनले मानवको शरीरमा हुने कोषमा संक्रमण गराउन भाइरसलाई थप सहज हुने समेत देखिएको छ । विज्ञहरुले हालसालै विकसित गरिएका खोपहरू यसको विरुद्धपनि उत्तिकै प्रभावकारी हुने बताएका छन ।
