विद्यार्थी भिषा खुकुलो गर्दै अष्ट्रेलिया

सिड्नी । कोभिड-१९ बाट केही हदसम्म अघि बढ्न सफल भएको अस्ट्रेलियाले आफ्नो अर्थतन्त्र उकास्नको लागि बिभिन्न नयाँ उपायहरु लागू गर्दै अगाडी बढिरहेको छ । यहिँ सेरोफेरोमा आज मोरिसन सरकारको शिक्षा मन्त्रीले प्रेस विज्ञप्ति निकाल्दै ५ वटा नयाँ विद्यार्थी भिसा व्यवस्थाको नियमहरु प्रस्तुत गरेका छन् । नयाँ नियम अनुसार अन्तराष्ट्रिय विद्यार्थी जो अस्ट्रेलिया पढ्न चाहन्छन उनीहरुलाई बिभिन्न विषयबाट सहयोग दिने जनाइएको छ।

अष्ट्रेलियामा अध्ययन गर्ने वा गर्न चाहने विद्यार्थीहरु कोरोना भाइरसका कारणले मर्कामा नपरुन र अष्ट्रेलिया अन्तर्राष्ट्रिय विद्यार्थीहरुका लागि एउटा छनौटको गन्तब्य बनिरहोस् भन्ने अभिप्रायले सरकारले विद्यार्थीहरुका पक्षमा भिषा सम्बन्धि निम्न व्यवस्थाहरु गरेको छ:

अस्ट्रेलियन सरकारबाट भिषा लागिसकेका विद्यार्थीहरुले, अन्तराष्ट्रिय उडान सुचारु भएसँगै अस्ट्रेलिया आउँन पाउने छन् भने केही समय देखि भिसाको प्रतिक्षामा बसेका विद्यार्थीहरुको आवेदनमा बिचार गरिनेछन ।
कोभिड-१९ का कारण अन्तराष्ट्रिय विद्यार्थीहरुले आफ्नो कोर्स समयमा पूरा गर्न नसकेको खण्डमा निशुल्क भिषा थपको सुबिधा पाउनेछन् ।
कोभिड-१९ का कारणले हाल अष्ट्रेलिया बाहिरै बसी अनलाइन क्लास लिएका विद्यार्थीहरुले पनि अष्ट्रेलियन अध्ययनको मापदण्ड पुरा गरेको मान्यता दिदै पोस्ट-स्टडी वर्क परमिट प्राप्त गर्न सक्ने छन्।
विद्यार्थी भिसा लिएर आफ्नै देशमा कोभिड-१९ को कारणले बसेका विद्यार्थीले पनि पोस्ट(स्टडी वर्क भिसाको लागि आवेदन दिन योग्य हुनेछन्।
विद्यार्थी भिसा आवेदन दिनेहरुकोका लागि अंग्रेजी परिक्षा अर्थात (आएलटस) को नजिताको प्रमाणपत्र पेश गर्नको लागि समय दिइने छ।

अन्तर्राष्ट्रिय विद्यार्थीहरूले अष्ट्रेलियाको अर्थव्यवस्थाका लागि प्रत्यक्ष ४० बिलियन डलर योगदान गर्दछन् ।