काठमाडौं । बंगालको खाडीमा विकसित शक्तिशाली चक्रवात ‘अर्नब’का कारण भारतको आन्ध्र प्रदेशका तटीय क्षेत्रहरू तीव्र हावाहुरी, भारी वर्षा र समुद्री छालबाट अत्यधिक प्रभावित बनेका छन्।
भारतीय मौसम विभागका अनुसार मंगलबार राति बापट्ला र यानमबीचको तटीय क्षेत्रमा प्रवेश गरेको चक्रवातको पछिल्लो भाग जमिनमा पुग्ने प्रक्रिया बुधबार बिहानसम्म जारी थियो।
तटीय क्षेत्रमा प्रतिघण्टा १२५ देखि १३५ किलोमिटरसम्मको गतिमा हावा चलिरहेको छ, जुन प्रतिघण्टा १५० किलोमिटरसम्म पुग्न सक्ने अनुमान गरिएको छ। समुद्रमा सामान्यभन्दा २.५ मिटरसम्म अग्ला छाल उठेकाले विशाखापट्टनमको आरके समुद्री तटमा सर्वसाधारणको प्रवेश र माछा मार्न जाने कार्यमा पूर्ण रोक लगाइएको छ। चक्रवातका कारण आन्ध्र प्रदेशका बापट्ला, गुंटुर, कृष्णा र विशाखापट्टनमलगायत १५ जिल्लामा आकस्मिक बाढीको चेतावनी जारी गरिएको छ भने विजयवाडा र आसपासका होचा भूभाग तथा मुख्य सडकहरू जलमग्न बनेका छन्।
सुरक्षाको पूर्वसावधानी स्वरूप विशाखापट्टनम, विजयवाडा र राजमहेंद्रवरम विमानस्थलबाट हुने हवाई उडानहरू रद्द वा स्थगित गरिएका छन्, जसमा एयर इन्डिया, इन्डिगो, अकासा र एयर इन्डिया एक्सप्रेसका उडानहरू समावेश छन्।
राज्य सरकारका तर्फबाट मुख्यमन्त्री एन. चन्द्रबाबु नायडूको नेतृत्वमा २ हजार १९९ वटा चक्रवात आश्रयस्थल तयार पारिएको छ भने १४ जिल्लामा एनडीआरएफका १२ र एसडीआरएफका १० टोलीसहित १ हजार ८७ स्वास्थ्य टोली र आपतकालीन सामग्री तयारी अवस्थामा राखिएको छ।
मौसम विभागले चक्रवातको गति सुस्त भएकाले यसको असर अझै केही समय रहने जनाउँदै सर्वसाधारणलाई घरभित्रै रहन, पुराना भवन वा रूखमुनि नबस्न र आधिकारिक सूचनाहरूको मात्र पालना गर्न आग्रह गरेको छ।
_20261027075715.gif)
