काठमाडौँ । सिनामंगलस्थित नेपाल पत्रकार महासंघको मतगणना स्थलमा ताला लगाइएको भनेर अध्यक्षका प्रत्यासी रमेश बिष्टले आपत्ति जनाएका छन् ।
‘निर्वाचन समितिको निष्पक्षतामा गम्भिर प्रश्न उठेको छ’, बिष्टले सामाजिक सञ्जालमा लेखेका छन्, ‘‘ मत गणना स्थलमा निर्वाचन समिति र एउटा पक्षको उम्मेदवारको मात्रै ताला लगाउनु आपत्तिजनक छु’, बिष्ट अगाडि लेख्छन्, ‘कोषाध्यक्ष पदको परिणाममा गर्न खोजिएको धाँधली र प्रहरी प्रशासनको दुरुपयोगको आपत्तिजनका छ ।’
पत्रकार महासंघको अध्यक्षका प्रत्यासी बिष्टले अछामको पुनः मत गणना गर्न पनि माग गरेका छन् । केन्द्रीय प्रतिनिधिको मत गणना सकिएको केन्द्रीय निर्वाचन समितिले जनाएको छ । केन्द्रीय निर्वाचन समितिका संयोजक प्राध्यापक चिरञ्जीवी खनालका अनुसार केन्द्रीय पदाधिकारीको मत गणना सकिए पनि केही जिल्लाको मत गणना जारी छ ।
अब जिल्ला र प्रदेशले पठाएको विवरण रुजु गरेर चुनावी नतिजा सार्वजनिक गर्ने तयारी छ । हालसम्मको अनौपचारिक रुपमा संकलन गरिएको मत अनुसार पत्रकार महासंघको अध्यक्षमा निर्मला शर्मा एक हजार बढी मतान्तरले विजयी हुने निश्चित भएको छ ।
शर्मा नेपाल प्रेस युनियन र प्रेस चौतारी नेपालको साझा उम्मेदवार हुन् ।
महासंघको अध्यक्षमा शर्मा र रमेश विष्टसँगै देवीप्रसाद सापकोटा र लालसिंह लामाले प्रतिस्पर्धा गरेका थिए । केन्द्रीय पदाधिकारीमा पनि शर्मा नेतृत्वको प्यानलका अधिकांश उम्मेदवार चुनाव जित्दैछन् ।
