काठमाडौँ । पाल्पा र मकवानपुरमा चट्याङ लागेर दुई जनाको मृत्यु भएको छ । पाल्पाको रैनादेवी छहरा गाउँपालिका–३ भुवनपोखरीस्थित डाँडागाउँका ५६ वर्षीय बिमलप्रसाद पन्तको गएराति परेको चट्याङले लागेर मृत्यु भएको जिल्ला प्रहरी कार्यालय पाल्पाले जनाएको छ।
पाल्पाका प्रहरी नायब उपरीक्षक सुगन्ध श्रेष्ठका अनुसार गएराति करिब ८ बजे घरमै बसिरहेको बेला चट्याङले उनलाई लागेको थियो।
‘चट्याङले लागेर गम्भीर घाइते पन्तलाई उपचारको लागि तानसेनमा रहेको लुम्बिनी मेडिकल कलेज प्रभासतर्फ लैजाँदै गर्दा बाटोमै मृत्यु भएको हो,’ उनले भने।
यता मकवानपुरको राक्सिराङ गाउँपालिका वडा नम्बर–२ थुम्की बस्ने ४५ वर्षीय वीरबहादुर प्रजाको चट्याङ लागेर मृत्यु भएको हो।
प्रजा आफ्नै घरमा सुतिरहेको अबस्थामा आज बिहान चट्याङ लागेर घाइते भएका राक्सिराङ गाउँपालिका २ का वडाध्यक्ष बुद्धराम मोक्तानले जानकारी दिए।
घाइते प्रजालाई उपचारको लागि हेटौंडा अस्पताल पुर्याउँदा डाक्टरले मृत घोषणा गरेका जिल्ला प्रहरी कार्यालय मकवानपुरका प्रहरी नायव उपरीक्षक एवंम् प्रहरी प्रवक्ता लक्ष्मी भण्डारीले बताइन्।
