काठमाडौं प्रधानमन्त्री एवं नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपाल समूहबीच भेटवार्ता सकिएको छ। पार्टी मुख्यालय धुम्बाराहीमा भएको छलफल सकिएको हो। पार्टीभित्रको विवाद चर्किएको चार महिनापछि दुई पक्षबीच भेटवार्ता भएको हो।
बैठकमा दुवै समूहले आ-आफ्नो अडान राखेको नेता रघुजी पन्तले बताए । प्रधानमन्त्री ओलीले राखेको पछिल्लो बैठक र निर्णयमा नेपाल समूहले आपत्ति जनाएको बताइएको छ ।
पार्टीमा ओलीले एकलौटी गरेको र आफूहरूलाई पेलेको भन्दै विद्रोहको तयारीमा रहेको नेपाल समूह र प्रधानमन्त्री समेत रहेका ओली समूहबीच विवाद समाधानको बिषयमा वार्ता भएको हो । पछिल्लो समय पार्टीमा देखा परेको विवाद समाधानका लागि कार्यदल बनाएर विवाद समाधान गर्न दुवै पक्ष सहमत भएको बताइन्छ ।
छलफलमा ओलीसहित उनका तर्फबाट ईश्वर पोखरेल, विष्णुप्रसाद पौडेल, प्रदीपकुमार ज्ञवाली र सुवास नेम्वाङ सहभागी थिए। नेपाल तर्फबाट नेपालसहित भीम रावल, सुरेन्द्र पाण्डे, घनश्याम भूसाल, गोकर्ण विष्ट र रघुजी पन्त सहभागी थिए।
अध्यक्ष ओलीले पार्टीभित्र एकलौटी गर्न खोजेपछि नेपाल समूह असन्तुष्ट छ। पार्टीभित्रको विवादको कारण एमाले फुटको अवस्थामा पुगेका बेला अध्यक्ष ओलीकै पहलमा संवादको थालनी गरिएको हो।
